SHILLONG, Nailur 12: Katba ka Northeast United FC ka dang pynkhreh ban sdang ïa ka samoi lehkai 2024-24 ha ka lympung Indian Super League, u Mandar Tamhane-CEO ka NEUFC, u la pynpaw ba na ka liang jong ka klob ka kwah ban pynlong ïa ka Jawahalal Nehru Stadium-Polo, Shillong kum ka madan ïalehkai hala ïing (Home Ground) na bynta ki jingïakhun ka lympung ISL.
ïa kane u la pynpaw ha ka Sngi Palei (12 tarik Nailur, 2024) haba ai jingkren sha ki lad pathai khubor ha ka jingïalang ba la pynlong kum shi bynta ban lehkmen hadien ba ka kynhun ka la ïohrah ïa ka namlahduh ha ka 133rd IndianOil Durand Cup 2024, kaba dei ka khusnam kaba nyngkong ïa ka klob naduh ba la seng ïa ka ha u snem 2014 ha ka 13 tarik u ïaïong.
Haba phai dien, ka NorthEast United FC ka la ïoh ban rah ïa ka nam lahduh ha ka 133rd Durand Cup, da kaba pynliem ïa ka Mohun Bagan Super Giant ha ka jingïakhun final kaba itynnat bha. Watla ka la shah lamkhmat haduh 0-2 ha ka kylla step, ka kynhun ka la wanphai da kaba tyngeh ban pynïakhaid da mar 2-2 kol shuwa ban khur ïa ka jingjop da 4-3 ha ka penalty.
“Ka long ka por kaba sngew sarong ïa Ngi baroh ha ka klob. Ka dei ka khusnam kaba nyngkong ba ka klob ka la ïohrah, bad Ngi kwah ban ai burom ïa kane ka khusnam sha baroh ki nongkyrshan,” la ong u Mandar Tamhane – CEO ka NEUFC.
“Ngi dei ka klob kaba mihkhmat ïa phra tylli ki jylla, ym tang ïa kawei ka jylla ne ka kawei ka nongbah. Ka jingkitkhlieh ka long kaba khraw ïa Ngi haba Ngi mihkhmat na bynta ki nongkyrshan. Kane ka namjop ka long na bynta ki nongkyrshan; ki dei hok ban ïoh ïa ka nam namar ba ki la kyrshan ïa ka klob watla ka don hapdeng ka jingeh. Ka dei ka namjop kaba nyngkong, bad ka long kaba kyrpang.” u la bynrap.
Ha kaba ïadei bad ka jingpyrshang bad jingthmu ka klob ban pynlong katto katne ki jingïakhun hala ïing (Home Game) ha JN Stadium-Polo, u la ong, “ïa mynta ka sorkar jylla Meghalaya bad na ka liang ka tnat Sports ki dang pyrshang ban pynbiang katto katne ki jingduna ha madan bad Ngi kyrmen ba ha u Kyllalyngkot ne Rymphang ngin sa lah ban wanrah ar ne lai tylli ki jingïakhun hala ïing ha nongbah Shillong na bynta ka kylla kaba ar jong ka lympung ISL”.
Kumban shu pynkynmaw, ka Northeast United FC ka la pynliem noh ïa ka Shillong Lajong da 3 kol ha ka semi final jong ka Durand Cup 2024, ha kaba palat 15,000 ki paidbah ki la wan sakhi ïa kane ka jingïakhun kaba la tip ruh da ka ‘Northeast Derby’.
U la ïaroh ruh ïa ka jinglong jong ka madanbad ka suiñbneng kaba pynngad, bad ngi kyrmen ba ngin sa ïoh ban pynlong katto katne ki jingïalehkai bad lada kam urlong, ngi thikna ba ha ka samoi ban wan ngin sa lah ban pynurlong, u la pynkut.
Ka Northeast United FC kan sdang ïa ka lynti ha ka ISL 2024-25 shabar nala ïing pyrshah ïa ka Mohameddan SC ha ka 16 tarik Nailur, katba ka jingïakhun hala ïing kaba nyngkong kan long ha ka 29 tarik Nailur pyrshah ïa ka Kerela Blasters.
