Yn bud dien ka EJNC-KC halor jingkular ka NHAI bad ka jingmaramot ïa ka surok NH-6

Khliehriat Risaw 20 : Ka East Jaiñtia National Council Khliehriat Circle kaba hapoh ka jingïalam u General Secretary, u bah Mebanteilang Sukhlaiñ, ka pynpaw ka jingsngew khia halor ka jinglong jingman ka surok national highway ha East Jaiñtia Hills District kaba la jot bad julor shaba palat bad ong ruh ba na ka liang ka seng kan ïai budien halor ka jingkular ka National Highway Authority of India kaba la kular ba kan maramot noh ïa ka surok.
Na ka liang ka seng ka la ïoh ruh ïa ka shithi jingpynshai na ka ophis u Deputy Commissioner ka East Jaiñtia Hills District ha kaba ïadei bad ka jinglong jingman ka surok national highway ha kaba la pynpaw ba ka ka ïing bishar ka la dep khot hajir ïa ki heh jong ka NHAI bad pan ka jingpynshai halor ka jingbym maramot ïa ka surok namar ka jingsniew palat ka surok ka la ktah haduh katta katta ïa ki paidbah nongleit nongwan bad ktah ruh ïa ka khaïi ka pateng bad ktah ha baroh ki liang.
La ong ruh ba la bishar ïa ki kaiphot kiba wan na u Chief Engineer ka tnat Public Work Departmet la ong ba ka surok ka la julor bad sniew bha bad kumjuh la bishar ïa ki kaiphot kiba wan na u Superintendent of Police ka East Jaiñtia Hills District ha kaba ïadei bad ki jingjia jingiathyngkhuh kali hapoh ka surok national highway kaba la paw ba dei na ka daw ka jingsniew palat ka surok.
La ong ruh ba na ka liang u Regional Officer (NE) National Highway Authority of India, u Project Director (NHAI), PIU-Shillong ki la leit ban hajir ha ïing bishar bad buh ruh ka jingthoh bad pyni ïa ki daw halor ka jingbym maramot ïa ka surok, na ka liang kitei ki heh jong ka NHAI ki la ong ba ka jingpynslem jong ki ban maramot ka dei na ka daw ba ka dang jur palat u slap bad ong ruh ba kiba bun ki jaka la dep ban maramot hynrei na ka daw ka jinghap slap ka kam ka sahteng noh, kiba bun ki jaka la dep maramot ha kaba ki la leh ïa ka Granular Sub Base (GSB) bad ka Wet Mix Macadam (WMM) hynrei ka jingwan u slap ka la kit lut ïa ki.
Na ka liang ka NHAI ka la pynshai ruh ha kaba ïadei bad ka jingbym pat lah ban maramot ne shna ïa ki nala tuid um ha Khliehriat khamtam ha ïew Khliehriat, la ong ba ka NHAI ka la dep buh briew (counsultan) ban peit ïa kane ka kam bad haduh mynta dang ap ïa ka kaiphot ban poi, ha ka jingshisha ka NHAI ka la pynpaw bad ong ba ïa ki nala tuid um ha Khliehriat la buh por ban pyndep ha ka 20 tarik u nailar 2022 bad ong ruh ba ki dang don shuh shuh ki kam ban pyndep ha sor Khliehriat, hynrei na ka daw ka jingther u slap ka kam ka sahteng bad ong ba lada ailad ka mariang bad bha ka suiñ bneng ïa ki kam yn pyndep noh.
Na ka liang ka ïing bishar kam shym la sngew hun ïa ki kaiphot jong ka NHAI bad ong ba ka jingbym bit bym biang ka surok ka la ktah ïa ki nongleit nongwan wat kito kiba na bar ka jylla ruh kum na Barak Valley (ASSAM), Manipur, Mizoram bad kiwei kiwei kiba ju ïaid lyngba na kane ka surok ba ka ktah ruh ïa ka khaïi ka pateng bad ka la ktah ruh ïa ki paidbah ha kiba bun ki liang.