Shillong, Rymphang 26: U Myntri ka tnat bording u A.T Mondal ula pyntip ba ha ki sngi ban wan ka tnat kan sa pynmih da ka jingbthah lane Circular sha baroh ki ophis treikam jong ki tnat Sorkar ban peitngor haba ïadei bad ki waiar bording lane ki tiar ba pyndonkam bording.
Kane ka wan hadien arsngi ba pluh ka ophis treikam Shillong Bar Association (SBA) ïa kaba la suba jur ba ka jingpluh ka dei na ka jingthut jong ki wire bording.
Haba pyntip ïa kane u Mondal u la pyntip ba ki don ki jingbthah naka MeECL haba ïadei bad ki sienjam ban shim naka bynta ban ïada na ka jingpluh ding kaba lah ban wan jia namar ka jingthut ka bording lane Short Circuit.
“Ngi la shim ïa ka rai ban pynmih da ka jingbthah lane Circular sha baroh ki tnat treikam ba kin pyrkhing bha ïa ki Wire bad kiwei ki tiar bala rim ba pyndonkam bording ïoh don kano kano ka jingthut lane Short Circuit” la ong u Mondal.
U Mondal u la pyntip ba kane ka Circular kan dei ruh naka bynta baroh ki ïing shimet ha baroh kawei ka Jylla.
U la ong ba ki Wire bad ki tiar ba pyndonkam bording ki don ka snem ba kut ban pyndonkam bad ki paidbah ruh ki dei ban peitngor ban kylla ne bujli noh lada ki la rim.
