Shillong, Rymphang 24 : Ka ïing Bishar High Court (HC) jong ka jylla ka la bthah ïa ka Sorkar Jylla ban bud ïa ki kyndon treikam kumba la bthah ban lah wanrah jingkhuid ïa ka pung Umiam.
Ha ka hukum ba pynmih ha ka 19 tarik Rymphang haba pynwai noh ïa ka PIL, ka Division Bench ba kynthup ïa u Chief Justice S Vaidyanathan bad Justice W Diengdoh la ong, “Kumta, ia ka PIl No.10 ba 2019 la pynwai noh da kine ki kyndon harum, kiba dei ban bud da ka Sorkar Jylla kumba ki long”.
Ka ïing Bishar ka la maham “Lada don ka jingbym bud kyndon na ka liang ki Ophisar kiba dei ban pyntreikam ïa ki kyndon haneng, dei ban ai ka jingpynshitom ïa ki bad ban pynrung ruh haka service register ban pynduh lad ba kin kiew kyrdan”.
Ki kyndon ki ong “Lada don ki nongkynti paidbah ba la ithuh ne ym pat don kano kano ka rai halor ki mukotduma,da kane ka ïing Bishar la dei ban pynïeng noh da ka sign board steel ba don ïa ki bar code & case number ha ka jaka ba kyndiang bha”.
Ka ong ba ïa kine ki jaka bala ithuh dei ban pynmih ha baroh ki website ka Sorkar khnang ban khanglad ïa kiwei ba kin nym kyntur sha ki nongkynti paidbah.
Ka kyndon ka ong ruh “Ym dei ban ailad ïa ka jingbuh dukan madan bad pynïeng kali ha kine ki jaka paidbah lait noh kiba ïaid kat kum ki kyndon aiñ. Ym dei ban ai jingbit ban pyndonkam ïa kine ki jaka kum ki jaka ïeng Auto/Taxi, kaba pynthut ïa ka ïaid ka ïeng ki paidbah bad ki kali lait noh kiba la ïoh jingbit”.
Ka ong ruh “Ym don mano mano ruh ba lah ban pynïeng ïa ki jingtei ba shipor ne ba shirta ha kine ki jaka ne ha ki lynti ïaid, lada don, khlem da ïoh jingbit na ki bor ba dei khmih. Lada don kino kino ki jingtei ba khlem ïoh jingbit, ki bor khmih ki dei ban leh eiei mar mar ha ka ban pynpra noh ïa ki”.
