Ym pat treikam ka Load Shedding, kwah u Myntri ban ym thut ka samoi thoh eksam ki samla pule

Shillong, K’Lyngkot 08 : Ka jylla haduh mynta kan ym pat ïa ka jingshong dum namar na ka liang u Myntri ka tnad Bording, u AT Mondal u la pyntip ba haduh mynta hi ym pat don dak ba ki hap ban leh ïa ka load shedding lane ban pyntreikam ïa ka jingpynlip bording kumba ju long ha kiwei ki snem ba la dep.
Haba kren bad ki lad pathai khubor u Myntri ka tnad, u AT Mondal u la ïathuh ba ka thong jong ka sorkar jylla ka long ban ïohi ba kan ym don kano kano ka jingthut bording ha ka samoi thoh eksam ki khynnah pule ka jylla.
“Kumba long haduh mynta hi, ka jinglong jingman ka bording ha ka jylla ka dang shngain bad kam pat don kano kano ka jingthmu ban pyntrei kam ïa ka load shedding,” ong u Myntri. Tangba u ong pat ba lada jïa ba poi haduh uta u pud ba kin hap ban leh, kin sa shong pyrkhat.
“Ka thong jongngi ka long ban pyntikna ba ka eksam kan ïaid beit khlem da don kano kano ka jingpynlip bording.”
Da kaba kam ba kin don beit ki jingeh, u Myntri u la ong ruh ba ha u snem thymmai ki la sakhi ïa ka jingjur ka jingpyndonkam bording bad kumta kane ka la buh jingeh bha ia ka tnad.
“Hynrei kumba nga la ong mynshwa, ngi dang shngaiñ ha ka jingdon ka bording ha ka jylla bad ngim pat don ka jingsyier ban ngat ha ka load shedding bad haduh mynta kam pat don kano kano ka dak ba donkam ban leh kumta,” u la bynrap biang.
Shuh shuh haba pynshai halor ka jingdon ki khep ba hap ban pynlip bording, u Myntri u la ong ba kine ki lah ban dei na ka daw ka jingdonkam ban maramot ïa ki laiñ bording ba la tip kum ka Revamped Distribution Sector Scheme (RDSS) ha ka jylla.
U ong ruh ba katei ka jingpynbha ïa ki lain bording kam dei satia pat ba kadei ka load shedding. Katkum ka jingong jong u haba don kino kino ki jingmaramot ïa ka lynti ïaid jong ka bording khlem pep kin hap beit ban pynlip ïa ka bording bad kane kan jia kumjuh lada ki hap ban pynheh ïa ki sub station.
“Kumta ngi kyrpad ïa ki padibah ba kin don ki khep ba ngi hap ban pynlip ïa ka bording watla kam pat don ka load shedding. Don ruh ki khep ba la don ka jingthut ha ka lynti ïaid jong ka bording ïa kata ruh ngi hap ban leit peit bad maramot kumta kum kine ki paidbah ki dei ban tip ba kam dei satia ba la treikam ka load shedding hynrei kadei ka jingpynlip ban pynbha ïa ka laiñ,” u la bynrap biang.