Ym pat paw ka shnong Sakhri ha ka Khanasamari, ud bym ju ïohi skim Sorkar

Shillong, Ïaiong 13 : Ka shnong Sakhri kaba dei ka nongrit ha ka thain Narpuh, East Jaintia Hills kadei kawei naki shnong ha ka Jylla kaba ym pat ïoh ban mad pura ïa kiba bun ki jingmyntoi kiba ju lah ban ïoh la ka long na ka sorkar jylla ne na ka sorkar pdeng.
Kawei pat kaba kham phylla ka long ba ki nongshong shnong ha kane ka shnong kim don kyrteng satia ha ka Khanasamari lane ha ka Census jongka Ri.
Ym tang katta, ki paidbah ki ju ïohi ruh ïa kiba bun ki jingmyntoi ba ju ïoh na ka sorkar la ka long naduh ki rashon ba kynthup ïa u khaw ne ka shini bad kiwei kiwei kiba ju ïoh ha kiwei pat ki shnong.
Ki nongshong shnong ki ïathuh ruh ba kim ju ïoh ruh ïa ki skim ba wan na ka sorkar pdeng bad na ka sorkar jylla. La ïathuh ba ka daw tynrai kadei namar ba kim don kyrteng ha ka Khanasamari.
Hynrei dei ha ka 08tarik mynta u bnai, ba ki heh sorkar na ki 10 tylli ki tnad sorkar na East Jaintia Hills District ba kynthup ïa u ADC ka District Bah G Wajri ba dei ruh u Project Director ka DRDA ki la hiar sha katei ka shnong ban ai jingpynshai ïa ki paidbah halor kiba bun ki skim bad ki lad jingïarap bapher bapher kiba wan na ka sorkar.
Na ka liang ki ophisar ki la kular ruh ba kin ïarap ban pynïaroh ïa ki lad jingïarap bad ki skim bapher bapher kiba dei na ka bynta katei ka thain.
Ha kawei pat ka bynta, kane ka shnong watla ka ïoh ïa ka Sanad Waheh Shnong na ka Jaiñtia Hills Autonomous District Council, hynrei haba thep vote elekshon pat ki hap ïa snoh bad ka shnong Lumtongseng. Nangta ka skim MGNERGA ne ki skim shi spah sngi pat ka shnong ka hap ïasnoh bad ka shnong Tongseng, kane ka ju pynklumar jingmut bad buh jingeh bha ïa ki nongshongshnong.
Na ka liang u ADC haba kren ha kane ka sngi u la pyntip ruh ba haduh mynta ka shnong Sakhri kampat don ïa ka Anganwadi Centre bad bun kiei kiei ki dang duna. Kumta u la kyrpad ïa ki heh sorkar ba kin don ka jingïatrei lang ryngkat ryngkat kynthup ïa ka NRLM bad CDPO na bynta ka bha ka miat, ka koit ka khiah bad ka bit ka biang jong ki paidbah.
“Watla ki nongshong shnong kim pat don kyrteng ha ka khanasamari (census) hynrei ka shnong mynta ka la ïoh ïa u LGD Code bad ki tnat treikam ka sorkar ki lah ban ïarap ïa ka shnong da kaba pyntreikam da u LGD Code,” u la ong.
Ki hheh sorkar na ka distrik kiba hiar sha Sakhri ha kane ka sngi ki kynthup naduh ka District Rural Development Agency (DRDA) Khliehriat, ka tnat ICDS, ka tnat pule puthi na ka ophis jong u District School Education, ka ophis u District Medical and Health Officer, ka ophis u District Mission Manager (NRLM), District Programme Manager (NHM), District Programme Manager (MGNREGRA), Block Development Officer Wapung C&RD Block, Block Development Officer C&RD Lumshnong Block bad na ka ophis jong u District Programme Manager (BDC).
Ki nongïalam shnong bad ki paidbah nongshong shnong ki la dap da ka jingkmen bad jingkyrmen ha kane ka jingleit jngoh ki heh sorkar ïa ka shnong bad kiba la kular ruh ban ïarap ïa ki ban pynïoh ïa ki lad jingïarap kiba na ka sorkar.
Ki heh sorkar kiba la ai jingpynshai sha ki paidbah ki kynthup u Dr. N.Phyllei, uba dei u Medical Officer jong ka Lumshnong PHC, u bah Arison Dkhar, uba dei u DPM jong ka NHM East Jaintia Hills District, u Block Development Officer Lumshnong C&RD Block, u bah M.Kyndait, i Cluster Resource Person ba na Tongseng.
Na ka liang i Kong Etrai Gympad i ba la kren bad pynpaw ha kaba ïadei bad ki jingduna kiba bun ha ki shlem ai jingnang jingstad ïa ki khynnah ha shnong Sakhri, ka DPM -.MGNREGA, i kong Sandalin Sutnga, u DPM (NRLM), i bah Kevin Slong na ka CDPO-ICDS Social Welfare Khliehriat, i kong Crisony pale, na ka Additional Programme Officer, Wapung C&RD Block, ka kong Meda Challam.
La ïoh ruh ïa ka jingkren bad jingpynsngew na ka liang u Secretary VEC Sakhri, u bah Damekner Rymbai bad ka Secretary VO, ka kong K.Rymbai, kiba la pynpaw ïa ki jingeh bad jingdonkam jong ki ha ki heh sorkar.
Na ka liang i Cluster Resource Person ba na Tongseng, i kong Etrai Gympad, i la pynpaw ka jingeh halor ka jingbym biang ki kamra klas ha ka skul SSA namar ki khynnah ki la don haduh 51 ngut bad ki kamra pat ki don tang ar tylli. Kumta ka la ong ba ki khynnah ki la shu ïa shong khapngiah bha ha ka por long skul bad buh jingeh ruh namar ka dei ka jaka kaba shit kumta donkam ba ki khynnah ba kin shong kylluid lada biang ki karma klas.
Na ka liang ka ASHA, ka kong Hosana Pdang, ka la pynpaw bad ong ba namar ka jingbym biang ka surok bad kane kaba buh jingeh ïa ki paidbah khamtam ïa ki longkmie kiba armet, namar ha kane ka thaiñ Sakhri, Lumtongseng ki kali ki lah ban ïaid tang ha ka por ba rang, ynda poi ki aiom slap ym long shuh ban ïaid ki kali, kumta ka ASHA ka pynpaw ka jingsngewkhia halor kane ka jingbym biang ka lynti syngkien.
Na ka liang u Waheh Shnong Bah Nildis Tongper bad u Secretary shnong u Bah Enus Syndor, ki la ai ka jingkhublei sngewnguh ïa u ADC, u bah G.Warjri bad ïa baroh ki heh sorkar kiba na East Jaiñtia Hills District kiba la wan sha shnong ban peit bad jngoh ïa ka shnong ka thaw bad kiba la pyrshang ban wad bniah ruh ïa ki jingdonkam ki nongshong shnong da kaba ki la leit ban rung sha ki thliew ïing jong ki nongshong shnong. Kitei ki nongïalam shnong ki la ai ka jingkhublei sngewnguh ïa kacompany Star Cement Lumshnong kaba la theh bun ki jingïarap sha ki paidbah nongshong shnong.
U bah G.Warjri, u la ai ka jingkhublei ïa ka company Star Cement kaba la theh ki jingïarap kiba radbah ïa ki nongshong shnong jong ka shnong Sakhri ha kaba ïadei bad ka jingpynïoh bor ding da ki solar enegry, ki surok, ki lynti syngkien bad kiwei kiwei ki lad jingïarap bad u la kyrpad ruh ïa ka company ba kan ïa snoh kti lang bad ai ka jingïatreilang shuh shuh bad ki bor district khnang ban dup lah ban leh eiei kham bun shuh shuh na ka bynta kane ka shnong Sakhri namar u la sngewthuh bad ïohi ba kane ka shnong ka dang sahdien bad dang don shibun ki jingduna ha kiba bun ki liang.
Na ka liang ka Star Cement Lumshnong la mihkhmat da ka kong Bornalee Kharlukhi bad ka kong Dayoosha Biam, la pynsngew ruh ba na ka liang ka CSR ka la leh bun ki kam kiba radbah na ka bynta ka jingbit jingbiang ki nongshongshnong ha kaba ka company ka la shna ïa ka surok kaba 6.5 kilomitar kaba pynïasoh bad ka surok national highway bad bun ki lynti ki syngkien.
Ka company ka la ai ruh 13 tylli ki solar street light, 39 tylli ki solar light ha ki ïing briew bad ha ka ïingmane kiba 500 watt solar power, namar ka shnong Sakhri ka dei ka shnong ka bym pat don bor ding electrict, ka ju pynlong ruh ïa ki prokram sam dawai ei sha ki paidbah, ka ïarap ruh ha kaba kyntiew ïa ka jingnang jingstad da kaba ailad ïa ki khynnah ban ïoh rung skul ha Star Public School bad buh ruh ïa ki school bus bym donkam ban siew pisa bad kiwei kiwei ki lad jingkyrshan bad kyntiew ha ka ïoh ka kot.