Nongstoiñ, Ïaiong, 13: U Executive Member uba khmih ïa ka tnat Land Development ka KHADC Bah Powell Sohkhlet ryngkat u MDC jong ka Rambrai u Bah Lurshai Kharbani, u MDC ka Nongstoiñ u Dr. Juristman Ïawphniaw ryngkat u Sirdar ka Hima Nonglang bad kiwei kiwei de ki nongïalam ka Hima ha ka sngi Saitjaiñ ki la leit jurip ïa u pud u sam ba pynïakhlad ïa ka KHADC bad GHADC.
Kane ka jingleit jurip ka long hadien ba ki dkhot jong ka Garo Students Union (GSU) bad ki briew kiba la kam ba ki dei na ka Garo Hills Autonomous District Council ki la pynpait pynpra ïa ki mawpud jong ka Kur Ñianglang ha Mawkuru kaba ha pud u sam ka Hima Nonglang.
Ha ka jingjurip la lon lang u EAC jong ka Mawshynrut Civil Sub Division bad SDPO ka Mawshynrut haduh ka jaka ba ïaid ka Wah Umpait hajan ka wah Ildek ha kaba ka don ka jingkieng ba pynïakhlad ïa ka East Garo Hills bad West Khasi Hills.
Hadien ba leit peit ïa kine ki pud ki sam, u EM bad ka kynhun ki la leit jurip ruh ha ka jaka ba pynpait maw pud da ka GSU ha Mawkuru.
Haba ïakren bad ki nongthoh khubor hadien kane ka jingjurip na ka liang u EM u la ïathuh ba kane ka jingwan jurip ka dei ka jingbthah jong u Chief Executive Member ka Khasi Hills Autonomous District Council u Bah Shembor Rynjah na ka jingpyntip bad jingujor jong u MDC jong ka Rambrai.
U Bah Powell u la pynrem jur ïa kane ka jingleh ki kynhun na Garo Hills da kaba ong u mawpud ba pynpra ka GSU bad GHADC, um dei u mawpud ka KHADC, hynrei u dei u mawpud jong ka kur Ñianglang ba la thung ban ïasam ïa ka jaka ne khyndew jong ka Kur. U la ong ruh ba kane ka jaka ba pynpait mawpud ka dang jngai na u pud jong ka West Khasi bad East Garo Hills.
U la ong ruh ba ki kot ki sla ki sakhi ba kane ka jaka kadei jong ka Hima Nonglang Sirdarship, kumta ka jingleh jong ka briew na Garo Hills ka long kaei kaei kaba ym lah satia ban pdiang.
“Haba ngi leit jurip ha Mawkuru ngi lap ba kine ki maw pud ba shah pynpra kim dei satia jong ka Council, hynrei ki dei kiba la thung da ka kur Ñianglang, kaba pyni ïa ka jingïasam jaka ïa sam khyndew jong ki. Namarkata nga pynrem jur ïa kata ka kynhun ba shu wan pynpait pynpra ïa ki maw bad ka dei ka jingleh khlem jingtip ne sngewthuh”, ong u Bah Powell Sohkhlet.
“Ka Mawkuru ka hap hapoh u pud u sam ka Hima Nonglang Sirdarship bad na kane ka jaka ba ki pynpait ki briew na Garo Hills, ka don ka bynta kaba kham jngai bad kham sharum kaba pynïakhlad ïa ka East Garo Hills bad West Khasi Hills lyngba ka wah Umpait. Mynshwa ka don ka jingïaknieh ha kane ka jaka bad ka High Court ha u snem 2011 ka la ai ïa ka rai pynskhem ba ïa ka jingïakajia, kata ka Mawkuru ka Nongkonghur, bad Ringkha ba ki dang hap hapoh ka Hima Nonglang”.
“Ha u snem 2019 ruh ka la don ka jingïalang ba la khot da u Commissioner Secretary jong ka sorkar Jylla, kata ha ka 30 tarik u bnai Jymmang ba la shim bishar ïa ki arliang mamla ha kaba ïa dei bad ka jingïaknieh pud. La pynskhem ruh ïa ka rai jong ka High Court jong ka Jylla ba kine ki jaka ki hap hapoh ka jingpeit ka West Khasi Hills District”.
“Ka jingwan jong ki briew na Garo Hills ka long kaba bakla bad beaiñ ruh, namar kine ki jaka ki hap hapoh u pud u sam ka Hima Nonglang bad West Khasi Hills District. Ngi dei ban kynmaw ba u pud u sam jong ka KHADC u dei hi u juh u pud u sam jong ki Hima Khasi jong ngi. Hangta ba kut u pud u sam jong ka Nonglang Sirdarship, dei hangta ruh dei u pud u sam jong ka Council”.
“Halor kane ka jingpynpait pynpra ïa u maw pud, nga ngeit ka kur ruh kan sa leh ïa kaba donkam bad ha kajuh ka por nga kyntu ruh ïa kiba leh ïa kane ka kam pynpait pynpra ba kin sngewbha ba kin ym leh shongshit, da kaba shu sngap ïa kiba wan pynshit kumne kumtai. Hynrei ki dei ban ieng beit halor ki jingpynshisha lyngba ki kot ki sla bad ki dulir, khnang ba kan ym wanrah kano kano ka jingïapher lane ïakynad hapdeng ki nongshong shnong kiba don mar syndah jong kine ki ar tylli ki District”, u la ong.
Kumban shu pynkynmaw hangne ba ha ka 7 tarik mynta u bnai, ki briew na Garo Hills ba la kynnoh ïa ka GSU bad ki briew na GHADC, ki la wan kiew shaduh sha Mawkuru ban pynpait ïa kitei ki maw pud jong ka kur Nianglang.
Ki dkhot jong ka KSU Mawshynrut ha ka 8 tarik mynta u bnai ki la leit jurip mar mar bad ki la leit hiar ruh sha jingkieng wah Umpait ban pynieng hi ïa ka Signboard ba la thoh Hima Nonglang Sirdarship, tangba ïa kane ka sign board ruh na ka liang ki briew na East Garo Hills ki la rah noh sha Garo Hills.
