Shillong, Iaiong 10 : Ka sorkar ka pat ïoh pdiang ïa ka jubab na ka Harijan Panchayat Committee (HPC) halor ka Blueprint ba la pynkhreh da ka sorkar na ka bynta ban pynkynriah ïa ki 342 tylli ki long ïing kiba sah ha Them Metor, ha Them ïew Mawlong wat hadien ba ka sorkar ka la buh por ba ki dei ban pynpoi hapoh kane ka 10 tarik mynta u bnai.
“ Haduh mynta ngim pat ïoh pdiang kano kano ruh ka jubab na ka HPC hynrei ngi la shu ïohi lyngba ki lad pathai khubor ba ki la mynjur ban wan ïa kynduh ïa ka sorkar” ong u Symbud Myntri Rangbah bah Prestone Tynsong.
U la ïathuh ba ka sorkar ka lah ban khot ïakren ïa ka HPC mynta ka taiew ban ïa pynbeit ïa kane ka kam. “ Nga la ïohi na ki kot khubor ba ki la rai ban wan ïa kynduh ia ngi, ka lah ban long mynta ka taiew lane ngi lah ban khot ïa ki ban wan ïa kynduh bad ïakren halor kane ka kam namar ngi la dep ai ïa ka blueprint sha ki bad ka shong ha ki ban ai rai namar na ka liang ka sorkar ka la dep pyni bad kdew ha ki ïa ki jingthmu ban pynkynriah ïaki, ong u bah Prestone.”
Lah ban pynkynmaw dang ha ka 16 tarik Lber ka sorkar ka la ai por ïa ka HPC ban ai jubab halor ka blueprint hapoh ka 10 tarik Iaiong namar ha katei ka blueprint la dep kdew shai ïa ka jingpynkhreh ban pynkynriah ïa ki na Them Iew Mawlong sha ka quarter jong ka Shillong Municipal Board hadien ka election MLA.
Ka sorkar ka la aiti ïa katei ka blueprint sha ka HPC naduh ka 29 tarik Nailur 2022 ha ka jingïalang ba la long ha Secretariat. Ha katei ka blueprint la pyni ïa ka jingpynkhreh ka sorkar ban tei da ki ïing ba bun mala ban ai jaka rah ïa ki 342 tylli ki long ïing.
Ha ka jingshisha na ka liang ka HPC ka la tyrwa ban pan jaka mar 200 square meter kawei ka long ïing jong kitei ki 342 tylli hapoh u pud u sam la European Ward nalor kata ban pyntei ruh ïa kitei ki ïing na ka bynta jongki hynrei ka sorkar ka la kyntait war ïa kane ka jingtyrwa jongki.
