Sa shi wat yn thnem ka jingïalap elekshon ki seng saiñpyrthei ha Sohïong Constituency
Shillong, Ïaïong, 10: Sa shi wat ki seng saiñpyrthei kiba pynieng ïa ki kyrtong ki ban aireng ha ka elekshon ba la pynsangeh shipor ha Sohiong Constituency ïa kaba la buh sngi da ka Election Commission of India (ECI) ban pynlong pat ha ka 10 tarik, Jymmang, 2023, kin sa hiar biang ban pan jingkyrshan ki paidbah.
Ïa ka elekshon ha Sohïong, kaba dei kawei na ki 55 tylli ki Reserved Seat napdeng ki 60 ki Seat hapoh ka Iingdorbar Thawaiñ jong ka Jylla, la pynsangeh shwa ka sngi thep vote kaba la long ha ka 27 tarik, Rymphang hadien ka jingkhladnoh kyndit jong u kyrtong ka United Democratic Party (UDP), ha ka 20 tarik Rymphang, u Bah HDR Lyngdoh uba long ruh u Myntri barim ka tnat Kam Pohïing.
Ka elekshon ka la long tang na ka bynta ki 59 tylli ki Assembly Constituency, ha kaba National People’s Party (NPP) ka la jop haduh 26 Seats. Bud pat sa ka UDP kaba la jop 11 Seats kiba la lam khmat ban thaw biang ïa ka Sorkar Meghalaya Democratic Alliance (MDA) 2.0 da ka jingkyrshan lang jong ka BJP, ka Hill State People’s Democratic Party (HSPDP) bad ka People’s Democratic Front (PDF) kiba jop mar ar Seat, nalor ki arngut ki MLA Independent.
Ka UDP, kaba long ka party kaba wan baar ha ka jingbun jong ki MLA hapoh ka Iingdorbar Thawaiñ dang shen ka la pynbna ïa u Bah Synsharlang Kupar Lyngdoh Thabah uba long u pyrsa jong u Bah HDR Lyngdoh ban mih bujli ha ka elekshon ka ban sa long bad kyrmen ruh ba un jop ïa kane ka jingïakhun.
Ki kyrtong kiba ladep thep kyrteng mynshwa ki long u Samlin Malngiang na ka National People’s Party (NPP), u Bah Osborne Kharjana na ka Congress, u Bah Eric Kharbuki na ka BJP, u Bah Stoding Thabah na ka Trinamool Congress (TMC) bad u Bah Sandondor Ryntathiang na ka HSPDP.
Ïa mynta, sa tang u kyrtong ka UDP uba hap ban thep ïa ka kyrteng.
Ka sngi khatduh ban thep kyrteng kan long ha ka 20 tarik mynta u bnai, ka sngi bishar kyrteng kan long ha ka 21 tarik mynta u bnai, ka sngi thep vote kan sa long ha ka 10 tarik Jymmang bad ka sngi ñiew vote kan sa long ha ka 13 tarik, Jymmang.
Da jingtreikam pura jong ka Model Code of Conduct ha baroh kawei ka East Khasi Hills District, u District Election Officer (DEO) u la pynjari ïa ki jingpyrkhing ïa ki kyndon ba la bthah da ka Election Commission of India (ECI).