Ki Pulit ka jylla ki lah ban tehlakam ïa ka jingkhaïi dewiong beaiñ : Dy CM

0

Shillong, Ïaïong 10: U Symbud Myntri Rangbah ka jylla uba dei peit ruh ïa ka tnat ki kam pohïing ka sorkar jylla u Bah Prestone Tynsong u la ong ba ki pulit jong ka sorkar jylla ki lah ban teh lakam ïa ka jingkhaïi be-aiñ ïa u dewïong ha ka jylla.
“Ki paidbah ka jylla kim dei ban artatien ïa ka bor bad ka jinglah jong ki pulit jong ngi namar ki don ka jingtbit bad jinglah ban leh ïa kino kino ki kam kiba dei ha ka ka laiñ jong ki,” ong u Bah Prestone haba kren sha ki lad pathai khubor.
Kane ka jingkren jong u Bah Prestone ka long hadien ba ka High Court ka la pan ktien na ka Central Industrial Security Force (CISF) la ka long ne em kaba la kloi ban wan pahara khnang ban teh lakam ïa ka jingshalan be-aiñ ïa u dewïong ha ka jylla.
Haba kylli la ka sorkar kan ujor pyrshah ïa kane ka hukum ka High Court, u Bah Prestone u la ong “Ngam pat lah ban ong eiei ïa mynta, hynrei ka la don ka jingphah shithi sha ka Ministry of Home Affairs (MHA) bad na ka liang ka CISF ka la ai jingtip sha ka MHA ba kam don pyrton pulit ban phah ka jylla.”
Shuh shuh u Bah Prestone u la ong ba na ka liang ka sorkar bad ka tnat pulit kin ym shong thait satia ban ïakhun ïa ka jingshalan bad khaïi be-aiñ ïa u dewïong ha ka jylla.
“Ngi dei ban sngewthuh hangne ba lada ki pulit ki ai jingpahara baroh 24 kynta ki kam be-aiñ kin dang jia hi,” ong u Bah Prestone.
“Ngim ju tip lupa lano u nongtuh un wan prong ïa ka ïing jong ngi hynrei la jar katta kum ka sorkar ngin pyrshang ïa kaba bhatam ban khang syndon sbak ïa kane ka kam khaïi be-aiñ i u dewïong ha ka jylla,” u la bynrap.
Lah ban kdew hangne ba High Court jong ka jylla ha ka 20 tarik u Lber , ka la bthah ïa ka Central Industrial Security Force (CISF) ba kan pynpaw hapoh ka lai taiew, ïa ka jinglong la kloi bad ki lah ne em ban wan tehlakam ïa ka jingkhaïi tuh ïa u dewïong ha ka jylla,
Shuh shuh ka High Court ha ka 13 u Lber 2023 u Dr N Mozika ula pyntip ba ki jingdonkam ba hap ban pynkhreh na ka bynta ban wanrah ïa 10 pyrton ki CISF kan shimpor kumba saw taiew eiei.
U Dr Mozika ula kdew ba ka CISF kan wan halor ka nongrim ba ka jingbuh ïa ki kan long tang ar ne lai snem shuwa ba ka Jylla kan buh ïa la ki jong ki briew ban shimti ïa ka kam.

Leave A Reply

Your email address will not be published.