Shillong, Iaiong 10 : Ka United Democratic Party (UDP) ka kyrmen skhem ba ki vote jingsngew synei kin treikam bha ha kane ka election ha Sohiong Constituency bad khlem pep u kyrtong jongka party un jop beit ha ka election ka ban long ha ka 10 tarik Jymmang 2023.
ïa ka Election la hap ban pynsangeh noh ha Sohiong hadien ka jingkhlad ba kyndit jong u kyrtong ka UDP uba dei ruh u Myntri ba rim ka sorkar jylla u bah HDR Lyngdoh ha ka 20 tarik Rymphang 2023.
Mynta ka UDP ka sei da u pyrsa trai hi jong u bah HDR Lyngdoh u bah Synsharlang Kupar Lyngdoh Thabah kum u kyrtong jongka ban ïa khun pyrshah ïa u kyrtong ka NPP uba dei ruh u MLA ba rim u bah Samlin Malngiang.
U General Secretary ka UDP u Dr Jemino Mawthoh u la ong ba khlem pep ka jingsngew synei kan ktah jur bha bad u kyrtong ka UDP un jop beit.
“ Kane ka long halor ka nongrim ba ki briew ki ieit bad burom bha ïa u Maheh HDR Lyngdoh namar u la long u MLA jongki la bun bun sien bad u la ïoh bha ban shakri ïa ki” ong u Dr Jemino.
U la ïathuh ba tang ha ka sngi ba la lum ïa ka jingialang ban pynbna ïa ka kyrteng u bah Synsharlang kum u kyrtong ka Party ruh palat 5000 ngut ki briew ki la ïawan tuid sha ka jingïalang ba la long ha Sohiong hi.
“ Hadien kumba 29-30 snem ei ei u bah HDR Lyngdoh u la rai ban pynïasoh noh sha ka UDP hynrei sngewsih pat ba u la khlad noh kyndit na kane ka pyrthei. Ban da ym dei ba la jia noh kane ka jingjia ka Sohiong ka la dei lypa ka Constituency ba ka UDP kan jop beit. Mynta ruh haba ngi la pynbna ïa ka kyrteng jong u bah Synsharlang kum u kyrtong ngi ïohi ïa ka jingrhem mynsiem jong ki paidbah bad nongkyrshan jong ka UDP” ong biang u Dr Jemino.
U la ong ka jingpynkhreh na ka bynta kane ka election ka la ïaid shaid shaid bad na ka liang ka Party ka la ïaid shakhmat ban leit pan ka jingkyrshan na ki paidbah ban pynjop don burom ïa une u kyrtong jongka uba dei u pyrsa trai jong u bah HDR Lyngdoh hi.
Shuh shuh u la ong “ Ki Circle jongka Party ki la trei bor bah ryngkat bad ki nongïalam jongka party ba kynthup ïa ki MLA bad MDC ban leit ïalap na ki rynsan ha ki jaka bapher bapher ban wanrah ka jingjop ba don burom ïa u bah Synsharlang Lyngdoh”.
U la ong ruh ba ka UDP ka la lehbha ha ka election ba la dep namar na ka 6 ngut ki la jop mynta 11 ngut bad kyrmen ryngkat bad ka Sohiong kin kiew sha ka 12 ngut ka jingdon ki MLA.
“ Ha ka jingshisha ha Khasi bad Jaintia ka UDP ka kiew bha ha ka election ba la dep namar ka jingïoh vote hapdeng ka UDP bad ka NPP ka long mar ïabam bad ïa kane lah ban pynshisha ba ka UDP ka jop 11 seat bad ka NPP 8 seat bad kane ka pynpaw ba ki paidbah ki ieit bad ai ka jingkyrshan ba pura ïa ka UDP.
