Shillong, Iaiong 10 : Ka Federation of Khasi, Jaintia and Garo People (FKJGP) ka la ong ba ka jingpyntreikam ïa ka Inner Line Permit (ILP) ha ka jylla kan ym don jingktah da lei lei ruh ïa ka kam jngohkai kumba la kam da ka sorkar.
Haba ïakren bad ki lad pathai khubor hadien ba ïa kynduh ïa ki heh ka tnad Tourism mynta ka sngi u President ka FKJGP u bah Dundee Cliff Khongsit u la ong ka Seng ka la leit jngoh bad jurip bniah ïa ka jylla Sikkim ban tip la ka jingpyntreikam ïa ka ILP ka ktah ne em ïa ka kam jngohkai ha katei ka jylla bad ka la lap ba kam don jingktah ei ei ruh em.
“ Ngi la ïoh jingtip ba ka kam jngohkai ha Sikkim kam don jingktah na ka jingpyntreikam ïa ka ILP bad kane ka long hadien ba la ïamir jingmut lang bad ki heh sorkar bad ki seng bapher bapher kiba trei ha ka kam jngohkai pyrthei ha katei ka jylla” ong u bah Khongsit.
Kumta u la kyntu ïa ka sorkar ba kam dei ban ïalam bakla ïa ki paidbah hynrei ba kan bud dien beit bad ka sorkar pdeng ban ïoh pyntreikam ïa ka ILP ha ka jylla. Nalor kane u la ong ruh ba ka sorkar ka dei ban buh jingthoh ne ban phah register ïa ki nongwan jngohkai kiba wan sha kane ka jylla.
