Shillong: Ka Shad Suk Mynsiem ba lai sngi lynter ka Seng Khasi Kmie, ka la poi noh sha kaba kut hynne ka sngi Mawlong ka 10 tarik u Iaiong 2023, hapdeng ka jingiphuh iphieng , ba da shongkun shong Blei, bad ba sakhi ïa kata ka jinglong ba nylla bad ba kyrpang ka jaidbynriew Hynñiewtrep Hynñiewskum, ha lympung Weiking, Jaiaw, Shillong.
Kumba ka juh long ka sngi ba kut jong ka Shad, ka dei da ka jingïalum lang ha ïing Seng Khasi, Mawkhar, Shillong, ha kaba ki Duhalia, ki la shim ïa ka bynta ban tem ïa ka ksing lumpaid hadien kane u Rgh Banteilang S Rumnong President ka Seng Khasi College/ Chairman ka Publicity Committee ka Seng Khasi Kmie, u la shim ïa ka bynta ban pynïaid ïa ka jingïalang.
Hadien kane u Rgh Dipshon. L. Nongbri, President Seng Khasi Mawlai, u la shim ïa ka bynta ban ban ïalam ïa ka jingduwai, hadien kane, ka la dei pat ka por ba ki nongshad lem bad ki nongïalam ba rangbah ka Seng Khasi Kmie, bynrap ki parakur parakha, la ïa mihlang khrui na ïing Seng ryngkat ka sur ka ksing lynti ban ïaid kjat sha Lympung Weiking, Jaiaw.
Haba la poi ha lympung, shwa ban sdang ïa ka shad, la ïoh ïa ka nguh ka dem ba la ai ka Komiti u Tymmen U San ïa kaba la pynbud pat daka jingshad ha baroh ki hynniew tylli ki skit.
Ha kane ka kynti ki nongshad ba wan ban ïashim bynta ki long ki shynrang 727 bad ki kynthei 724 bad baroh ki long 1,451 , kaba da pynishong kun shong Blei, haduh katta katta, katno tam lei lei haba ki kjat sngi ba shat thaba jong ka ‘mei ngi’ ki da wan ban shat thaba ha ka riam shad kaba nylla ba hara.
Nalor ki nongshad, la wan ruh ban sakhi da kiba bun ki kynrem ki lyndan bad ba kham paw ki long naduh u Lat ka jylla u Phagu Chauhan, u Symbud Myntri Rangbah bah Prestone Tynsong, CEM KHADC bah Titostrawell Chyne, u DGP ka jylla u Dr L.R Bishnoi, nangta ki heh ophisar jong ki shnat treikam bapher bapher ka sorkar jylla bad kiwei kiwei.
Shuh shuh la wan ban ïa synran lang ruh da u President bad Secretary jongka Sein Raij Jowai, ki Seiñ Raij Shillong u Dolloi ka Elaka Jowai , ki Pressident bd ki Secretary jong ki jylli bad ki tnat ka Seng Khasi. Nalor la pyndap hi smam ïa baroh sawdong ka lympung shad da u u paid byllien, kiba da pynleit jingmut lang artad ha ki sur jong ka ksing, ka nakra, ka bom, ka tangmuri.
Haba la kut ka shad ka kmen, shwa ban wanphai biang sha ïing Seng, Mawkhar, la ïoh ïa ki kyntien ai khublei ba la ai da u Rgh Hammar Singh Kharhmar Cultural Secretary Seng Khasi Kmie, ka jingduwai na u Rgh Donbokstar Kurkalang, bad la pynhhiar ïa ka lama ka seng da u Rgh Rubi Binong, President Seng Khasi Raid Marngar bad pynbud biang da ka jingduwai da uwei na ki dkhot ka Kynhun U Tymmen U San bad hadien kane, la ïaid tawiar lai sien lai wat ïa ka lympung bad wanphai noh artad sha ïing Seng, ryngkat ka phawar arted lynti.
Haba la poi ha ïing Seng, u Rgh Hainess Marbaniang, General Secretary, Seng Khasi Kmie, Mawkhar, Shillong, u la shim ïaka bynta ban ai ïa ki kyntien ai khublei bad sa pynkut da ka shad mastieh ha phyllaw jong ka Seng Khasi Hall.
Haba phaidien sha ki lai sngi jong kane ka ka shad ai nguh ba shi sien shi snem, katba nang mih ki sngi, ka dur ka dar, ka jinglong jingman hi jong kane ka shad ka ïai phuh ïai phieng, namar dei ha kum kane ka samoi, ba ïa kata ka tynrai jingngeit kaba janai bad ba jylliew bha jong ka jaidbynriew Khasi, da shisha ka wan ba kan mihpaw ha kane ka shad, namar ka kynthei haba ka iuh kjat ha lympung, ka da wan ha ka longrynieng kaba khuid ba suba ba nylla bad sotti ka jong ka, katba u shynrang, ka riam ka beit ka jong u ka kup shisha ïa ka bynta kum u nong ri u nong da u nongsumar sukher ïalade, ïa la ka kur ka jait bad ïa la ka it ka hima, ka ri ka muluk.
Da kumta, kaei ka dulir bah ban pynpaw ïa ka jinglong ba nylla kum ka jaidbynriew, lah ban ong ba ïa ka jubab kaba shai bad ba paw shynna eh ka dei ha ka dur ka Shad Suk Mynsiem, kaba pynpaw ïa ka jutang kaba la ïateh hapdeng u Bynriew bad la U Blei Nongthaw Nongbuh, haba la bit la biang nadong shadong, u bynriew u pynpaw ïa ka jingsngewnguh ka jong u ïa la u Blei Trai Kynrad da ka ka shad ka kmen ha ryngkat ka duwai ba U Blei Trai Kynrad ba un ïai theh sei ïa la ka kyrkhu kyrdoh ha u khun bynriew ba un lah ba un kai un padun, un kamai un kajih, ba un trei un ktah ban roi parum pareh ha snieh jong kane ka sla pyrthei, ha ryngkat ba un nang ïar ka Tip Briew Tip Blei ka Tip Kur Tip Kha Ban Ieit ïalade bad Burom ïa kiwei bad ban Kamai ïa ka Hok.
