Ym mynjur u Khynnah Klas IV ban pynbthei pataka ha ka Diwali namar ka wanrah jingjakhlia ïa ka mariang

Shillong, Risaw 24: Ka sngi kyrpang Diwali jong ki Riewngeit Hindu ne ka tamasa ka jingshai kaba ju rakhe shisien ha ka shisnem da ka jingthang diya, ki bom pataka ki syntiew ki skud bad ki laiphew rukom ki rukom rakhe ïa kane ka tamasa ka jingshai. Ha ka jingïakren bad uwei u khynnahrit uba dang pule ha ka klas IV u pynpaw ïa ka jingbym sngew ïahap jong u ban rakhe Diwali da ka jingpynbthei pataka namar ka wanrah ïa ka jingjakhlaia ïa ka mariang u la ong.
Ha ka jingleit u nongthoh khubor ban shim kylli nshaphang ka iew bad ka jinglah die ïa ki bom pataka hadien ba ka sorkar ka la pynjari ïa ka hukum ba ym lah ban thang bom patakaka katba mon hynrei tang naduh 8 baje janmiet haduh 10 baje bad katba dang ïaleh ban kylli ïa ki katto katne ngut ki khynnah ki sngew kumno namar ka jingbym ïoh lad ban lehkmen Diwali, uwei u khynnah uba dang pule ha ka klas IV u la ong ba ha u marwei u sngew ba ka biang eh kaei ka hukum kaba ka sorkar ka pynmih namar ka wanrah ïa ka jingpynjaboh ïa ka mariang.
Une u khynnah u la ong ka jingpynbthei pataka ym tang ba ka pynmih ïa ka sur ba pynkyndit ïa ki briew khamtam eh ïa ki tymmen hynrei ka jingthud ki mrad ki mreng kiba shong ba thiah ha ka por ba u bthei ka long kaba khraw bad u la ong ba nalor ka jingpynthud ka sur hynrei ka wanrah ka jingjakhlia ka lyer na ka tdem ba mkih ha ka por ba thang bom.
“Kaei kaba ka sorkar ka ai jingbthah nga da mynjur eh ym namar ba nga tieng ban oynbthei bom ïa lade hynrei ba nga ieid ïa ka mariang,’ ong une u khynnah.
Kane ka jubab jong une u khynnah uba ym pat kynjoh 10 snem ka rta ka la pynlyngngoh ngaiñ ïa u nonglum khubor haba ïohsngew na ka sur jong u khynnah uba ha ka jingbalaiñ, u don ruh ïa ka jingshemphang shaphang ka mariang bad ki jingdon jingem ha ka.
Haba pyrshang bad ïakren bad ki nongbuh dukan die pataka halor ka iew ka hat jkong ki, i la ïathuh ba ka jingrakhe diwali ha une u snem ka rit bha namar ka jingwan ther u lapbah bad ki khynnah kiba ju sngew tynnad ban pynbtehi pataka ruh kim long shuh ban thang bom namar ka jingther u lapbah lapsan.
Haba la kylli la kane ka jingrit iew ïoh ka dei na ka daw ka hukum ba ka sorkar ka pynjari ïa ka jingthang bom, na ka liang jong ki ki la ïathuh ba ka daw hi ka dei namar u slap bah ba ka mariang kam ai lad ïa ki ban rakhe ha ka rukom ba ki ju leh wat la lehse ki ong ba ka lah ban don ka jingsdang sngewthuh na ki katto katne ki riew ieid mariang ïa kata ka jingjakhlia ka mariang lada thang bom.
Haba kylli ïa kiwei pat ki dukan die jingdie halor ka die ka iew ka jong ki kiba bun ki pynpaw ba kam don satia kano kano ka jinglahdie kumba ju long manla u snem namar kiba bun ki briew kim nud mih shuh na ïing namar ka jingther u lapbah.
“Ha kine ki shi sngi ar sngi ka iew ka kham kiwe hynrei mynta ka sngi la dei ban heh iew jia kynsan kane ka jingther u lapbah ba kiba bun hi kim nud shuh ban mih na ïing ban wan siew wan tda” ong uwei u nongbuh dukan ha Laban.