Shillong, Risaw 24: Kum shibynta ban pynkhlaiñ shuh shuh ïa ka jingtreikam jong ka seng ha nongbah Shillong,ka seng FKJGP ha ka sngo thohdieng jong ka 21 tarik Risaw ki la ïoh ban pynskhem thymmai ïa ki nongkit kam jong ka FKJGP Nongmensong Circle kum shi bynta ruh ban rakhe ïa ka lyngkhuh sngi khlad ba 34 jong u Wickclife Syiem.
Haba kren ha ka jingïalang na ka liang jong u Samla Kitboklang Nongphlang, Vice President FKJGP Central Body u la ai khublei kyrpang ïa ki khun samla jong ka Shnong Nongmynsong kiba la jied ïa ka lynti ban shakri ïa ka shnong ka thaw bad ïa ka Jaitbynriew hi baroh kawei lyngba ka seng FKJGP kaba long ka seng kaba la ai ka jingshakri ïa ka Jaitbynriew bad ïa ka jylla hi baroh kawei mynta la laiphew lai (33) snem kynthih wat hapdeng ki jingeh bad ki jingshah pyntyrha ha kiba bun ki liang.
U la ong ba ki dkhot ka FKJGP ki dei ban long ki mawbyriew ka jingkylla ha ka jylla bad ka imlang sahlang.
“Kum ka seng ngi iengskhem ha ka nongrim jong ki lai tylli ki mawbyrsiew ban wanrah ïa ka jingkylla ha ka imlang- sahlang (Social change), ban wanrah ïa ka jingkylla ha ka ïoh ka kot (Economically change) bad ban wanrah ïa ka jingkylla ha ka synshar – khadar (Politically change),” u la ong.
Na ka liang jong u, u la kyntu ruh ïa ki khun samla kiba la wan ban pyn ïasoh ïalade bad ka FKJGP ba kin long ki rishot kiba skhem jong ka Jaitbynriew wat hapdeng ki jingeh bad ki jingïaleh kiba bunjait ban ïada ban pynneh pynsah ïa ki hok longtrai jong ka Jaitbynriew ha la ka jong ka khyndew ka shyiap bad u la kyntu ruh ba kum ki khun dap shynrang jong ka Jaitbynriew kim dei ban ailad satia ïa u nongwei nong ar ba un leh trai khlieh ha kane ka ri kaba ieit eh ka jong ngi.
Na ka liang jong u President ba rangbah duh jong ka FKJGP u Bah Dundee Cliff Khongsit ha shwua ban pyntian smai ïa ki nongkitkam ba thymmai jong ka kane ka Circle u la ai ki jingsneng jingkhraw bad jingkyntu kynpham ïa baroh ki dkhot ba ki dei ban ïaid ha ka lynti kaba dei katkum ka riti treikam jong ka seng bad u la ong ruh ba kum ka seng kam don eiei ban ai ïa ki dkhot kiba wan ban pyn ïasoh ïalade bad ka FKJGP hynrei kin ai ka jingshngaiñ bad ban long ki nongïada ïa la ki jong ki para doh ki para snam la ka dei makna ban ïatyngkhuh bad kino kino ruh ki bor hynrei “ngin pyntikna ba ïa ka hok longtrai jong ngi ngim dei satia ban ailad ba kiwei kin knieh noh na ngi, namar ngi la ïoh pateng ïa kane ka ri kaba ieit eh jong ngi na ki longshwa ki jong ngi bad ngin hap ban ai pateng pat ïa ka sha ki longdien ki jong ngi.”
Ha kane ka sngi la pynïaid ïa ka jingïalang da u Chief Organising Secretary Sengkmie Samla Khrawkupar Nongsiej bad la pyntian smai da u President Rangbah u Dundde ïa u Simon Myrthong kum u President, Jibenson Kharumnuid Vice President, Ristborn Thabah Genl-Secy, Allan Kharkongor Asst.Genl-Secy, Loveous Nongkhlaw Organizing Secy, Phar Marbañiang Asst.Orgn-Secy, Phar Marbañiang Information Secy, Romeo Mawrie,Dame Lyngdoh Asst info. Secy, Andrew Nongsteng Sports Secy, Wickclife Kharkongor. Asst. Sports Secy bad ïa ki 12 ngut kum ki dkhot sha ka Executive Committee.
