Nongstoiñ, Jymmang, 01: Watla ki jaka treikam jong ka Meghalaya Rural Bank ki la don kumba lai tylli ha sor Nongstoiñ, kawei hajan ka ophis jong u Syiem ka hima Nongstoiñ, kawei ha Nondeiñ bad kawei pat ha Nongpyndeng. Hynrei ki paitbah nongkynshew pisa ha kitei ki Bank ki dang ïakynduh jingeh bha, namar ïa baroh ki jingdon kam la pynïaid tang na ka main building kaba don hajan ka ophis jong ka hima Nongstoiñ.
Ha ka sngi balang ki nongïalam ka FKJGP Nongstoiñ circle hadien ka jingud jingnam jong ki paitbah, namar ka jingpynslem palat jong ki nongtrei jong katei ka Bank ban pynïasnoh ïa ki adhaar number bad pyndep ban leh KYC ïa ki Account, ki la leit ban ïakynduh ïa u Branch Manager ban ïaphylliew jingmut bad ban kyrpad ïa u ba un thaw lad bad bthah ïa ki nongtrei ba kin kham pynsted ïa ka jingtrei kam khnang ba kan ym buh ïa ki paitbah ha ka jingeh.
U bah Flymingstone Tyrsa Education secretary ka seng haba ïakren bad ki nongthoh khubor, u la ong ba bun ki paitbah ki la ud ba haba leit sha katei ka Bank ban phah pynïasnoh ïa ki adhaar number bad ban phah pynthymmai ïa ki pass book.
La ong ba ym lah ban pyndep ha kajuh ka sngi bad hap ban leit haduh arsien lai sien, kumta ka la ktah ïa ka por bad ka jinglut jingsep khamtam eh ïa kito kiba jngai ki shnong ki thaw kumta ka seng ka la hap ban shim ïa ka lad ban ïarap ïa ki.
Nalor kata u la ong ruh ba ha katei ka jingleit ïakynduh jong ki u BM jong katei ka Bank, u la ong ba ka jingslem ka dei namar ba la bun palat ki customer bad ka System ka la suki ban treikam namar ka la khia palat.
Watla katta ruh u la ong ba un sa ïaleh katba lah ban pynsngewthuh ïa baroh ki nongtrei ba kin pyrshang katba lah ban pynsted ïa ka rukom trei kam na ka bynta ka jingmyntoi jong ki paitbah.
