Haduh 42 KM ki khappud Meghalaya bym pat ker sainar shiah, kyntu u IG BSF ban ai jaka

By Mawphor Editor On May 2, 2025

Shillong, Jymmang 01 : Ka Meghalaya ka la don haduh 42 kilometer ka khappud bad ka Bangladesh kaba ym pat ker sainar shiah, ong u Inspector General (IG), jong ka Border Security Force (BSF), u OP Upadhyay.
Haba kren bad ki lad pathai khubor, une u heh ka BSF u la kyrpad ruh ïa ki nongshong shnong ba kin ai ïa ki jaka khnang ba ynlah ban ker sainar shiah kaba dei ka mat kaba donkam bha na ka bynta ban wanrah ïa ka jingshngain jong ka jylla bad ka ri hi baroh kawei.
“Ka don kumba 42 kilometer ka jaka khappud tang ha Meghalaya kaba ym pat ker sainar shiah, bad bun na kane ka daw kadei ba ym ïoh jaka,” ong u IG BSF haba kren bad ki lad pathai khubor.
U la ong ruh ba na mynta ki dang buddien ïa kane ka kam bad ka sorkar jylla bad ki ophisar jong ka sorkar jylla kumjuh bad u Myntri Rangbah ka jylla. Nangta u ong ruh ba na ka liang jong ki ruh ki la pynpaw ïa la ki jong ki jingsngewkhia haba ïadei bad kane ka ishu bad ki la shimkhia ruh ïa ka.
“Nga kyrmen bad nga khmih lynti ba ka jingeh halor kane yn sa lah ban weng noh,” u la ong.
U IG u la pyntip ba ki Deputy Commissioner jong ki distrik ba shah ktah ki la shimkhia lang halor kane ka kam bad ki dang pyrshang ruh ban pynkohnguh ïa ki trai shnong, kito kiba ki jaka jong ki kin sa shah ktah. U ong ruh ba ki nongshong shnong ki pynpaw ïa ka jingsngew ba lada wan ka jingker sainar shiah ki syier ïa ka jingduh ei ki jaka kiba hap shabar jongka jingker.
Na ka liang u IG BSF u la ong ba un pyrshang ban ïarap ïa ki paidbah khappud katba kaba u lah lada ki donkam ia ka jingïarap jong ki BSF la ka long ha ka jingpahara bad kiwei kiwei.
“Nga shim ruh ïa kane ka lad lyngba ki lad pathai khubor ban kyrpad ïa ki paidbah ba sah ha khappud ba kin ai ka jingïatrei lang bad ban ai ruh ïa ki jaka na ka bynta ban ker sainar shiah namar kadei ka dei ka mat kaba kongsan bha namar ka ktah ïa ka ri baroh kawei. Tang shu ïoh ban ker sainar shiah ka jingshngain kadei jongki paidbah ka jylla hi bad jong ka ri hi baroh kawei,” u la ong.