Shillong, Nailar 28 : U Myntri ka Tnad Food & Civil Supply & Consumer Affairs Bah Comingone Ymbon ha ka sngi Balang ula pyntip ba ka Sorkar Jylla kala ïai kyrpad na ka por sha ka por ïa ka Sorkar Pdeng ba kan nang pynrung shuh shuh ïa ki nongïoh marbam rashon na ka National Food Security Act (NFSA) ha Jylla khnang ban lah pynbiang marbam ïa ki nongshong shnong kiba la nang kiew.
Hynrei, ka Sorkar Pdeng kala pyntip ba kano kano ka jingpynkylla ha ka jingdon ki nongïoh marbam rashon, ka dei kaba hap ban ap ïa ka khana samari ban pynmih thymmai.
Ula pyntip ïa kane haba jubab ïa ka call attention motion bala wanrah da u MLA ka UDP na Mawkyrwat Bah Renikton Lyngdoh Tongkhar, uba la pynpaw ïa ka jingsngewkhia halor ka jingeh ba la ïakynduh da ki nongshong shnong ka Domtynrong namar ka jingbym ïoh mar bam rashon la bun snem.
“Wat hapdeng ka jingïai kyrpad jong ka Sorkar Jylla ban nang pynrung shuh shuh ïa ki nongïoh marbam rashon hapoh ka NFSA namar ka jingnang kha roi ki briew ha Jylla bad ban weng ïa ki jingeh kum kaba mad da ka Shnong Domtynrong, ka Sorkar Pdeng kala ïeng ha ka nongrim ba kano kano ka jingpynkylla ïa ki nongïoh rashon kan dei kaba hap ap haduh ka khana samari ba thymmai” ong u Bah Ymbon.
Ula ong ba wat hapdeng kine ki jingpyrshang bad ka jingpyndep lut ïa baroh ki kam ba donkam, ka jingpynrung ïa ka shnong Domtynrong ha ka thup ki nongïoh bynta ïa ka NFSA kala shah ktah namar u pud ban ai bhah marbam bala buh da ka Sorkar India.
“Ka Sorkar India kala pyntip ba ka Jylla kala dep kynjoh ïa u pud bala buh jong ka NFSA kaba la pynshong nongrim na ki jingkheiñ jingdiah ka SECC 2011 bad kano kano ka jingpynkylla ïa ka jingsam marbam rashon kan dei kaba hap ban ap haduh ka khana samari ban pynmih thymmai bad ka jingslem ban lum ïa ka khana samari ba thymmai kala shah ktah namar ka khlam Covid-19” ula ong.
Naduh u 2011, ka Jylla Meghalaya kala sakhi ïa ka jingkharoi ki nongshong shnong ha kaba la buh antad ba ka jingdon ki nongshong shnong ha u 2023 kala kot kumba 38.16 lak, haba ïanujor bad ka 29.17 lak bala buh jingthoh da ka SECC 2011.
Kane ka jingkharoi kala lam sha ka jingkiew ka jingdawa ïa ka marbam rashon hapoh ka NFSA, kaba la nang buh ha ka khim khait ban pynbiang mar rashon namar u pud bala buh da ka Sorkar Pdeng.
