Shillong, Nailar, 28: U Symbud Myntri Rangbah ka Jylla uba khmih ïa ka tnat Kam Pohing u Bah Prestone Tynsong ha ka sngi Balang u la ïathuh ba ka Sorkar ka dang ap ïa ka kaiphod kaba bniah na ki bor synshar District shwa ban shim rai ban plie noh ïa ka surok ha Them Ïew Mawlong.
Ïa kane ka mat la wanrah da u MLA ka VPP na North Shillong u Bah Adelbert Nongrum ha ka Ingdorbar Thawaiñ namar ka jingdheng kali namarba la khang ïa ka surok hadien ba la mih ka jingïakhih kaba jur ha u snem 2018.
Ha ka jubab, u Bah Tynsong u la ong ba ka Sorkar ka don ïa kajuh ka jingsngewkhia kumba la pynpaw da u dkhot namarba ka jingdheng klai ka la long shaba palat ha ka thaiñ Motphran bad wat haduh them Ïew Mawlong.
U la ïathuh ba dang shen la shong jingïalang halor kane ka kam.
“Ym tang ka Sorkar marwei ba ngi lah ban ong to plie noh hynrei ngi donkam ruh ban da ïohi shwa ïa ki kaiphod kiba bniah namarba dei na kane ka surok kaba la pynmih ïa ka jinghuri hura,” la ong u Bah Tynsong.
“Namarkata, ngi ladep ban bthah ïa ki bor synshar district, ïa u SP bad nga ngeit shen kin sa lah ban ai ha ngi ïa ki kaiphod kiba bniah khnang ba ngin dup lah ban pynthikna ba ka jingrung jingmih na kane ka surok kan urlong noh shen,” u la bynrap.
