Ym ju don shuh ki jingjia pynsyier pyntieng ha kine ki snem: ong u Lat ha Iingdorbar

Shillong, Rymphang 16 : U Lat ka Jylla, u Phagu Chauhan ha ka jingkren maitphang ha ka sngi sdang jong ka Dorbar Mangtyngka jong ka Ïing Dorbar Thawaiñ ka jylla u la ong ba ka suk ka saiñ ka la sdang ban synshar ha ka jylla ha kine ki khyndiat snem ba la dep.
“Bun ki sngi khraw jong ka Ri bad jong ka jylla la ïoh ban rakhe khlem kino kino ki jingshah pynthut shah pyndik,” ong u Lat ha ka jingkren lamphrang.
Shuh shuh u ong ruh ba ka sorkar jylla ka buh thong ban wallam ïa ka jingsuk kaba junom ha ka jylla bad dei na kata ka daw ka ïai ban ba ka long kaba kloi ban ïa kren ïa suk bad ka kynhun kieng atiar jong ka HNLC katkum ki kyndon jong ka Riti Synshar ka Ri bad ruh katkum ki kyndon jong ka tnad Kampohïing jong ka Ri.
Haba kren pat halor ka jingsoi ïa ka soskular pynbeit pud ha u snem 2022 naka bynta ki hynriew tylli ki jaka ïa kajia kaba dei ha ka kylla kaba nyngkong, u Lat u la ong ba ka kam na ka bynta ban sorjamin na ka bynta ban buh pud ka la ïaid shakhmat.
“U Myntri Rangbah ka Assam bad Meghalaya ki la ïa kynduh biang ha u Jymmang 2023 ban pynïaid shakhmat ïa ka kam na ka bynta ki hynriew tylli kiwei pat ki jaka ba kajia pud ba dang sah. Ki Regional Committee ki la dep ban pynlong ïa ki jingïalang bad ki bor sorkar ka Assm bad ka kam na bynta ban pynbeit ïa kane ruh ka la ïaid shakhmat,” u la ong.
Shwa kane, u Lat u la pyntip ruh ba ka tnad Kampohïing ka jylla ka la pynkhlaiñ ïa ki jaka treikam ha ki distrik kynthup lang ia ki Fire Emergency Services.
La ong ruh ïa ka jingthung kam ba sahteng kaba don haduh 1,010 tylli ki kam la dep ban pyndap ha u snem ba la dep ban pynkhlain ïa ka tnad Pulit. Shuh shuh la iathuh ruh ba ki la don sa kumba 3,000 tylli ki kam ba dang thylli ha ki kyrdan bapher bapher jong ka Meghalaya Police kiban sa pyndap noh shen.