Ym hun ki nongtrei ka EMRI-108 ba pynkiew tulop ka Sorkar Jylla tang 7 percent

Shillong, Naiwieng, 04: Ki nongtrei jong ka EMRI-108 ki la pynpaw ïa ka jingbym sngewhun halor ka jingpyntip jong ka Myntri ka Koit ka Khiah ban pynkiew ïa ka jingsiew bainong kaba 7 percent na ka jingsiew bainongkaba ki ïoh mynta.
U President jong ka Meghalaya EMRI Workers Union (MEMRIWU) u Bah Roypar Kharraswai ha ka jingïakren bad ki lad pathai khubor hadien ba la wai ka jingïalang ha ka sngi Saitjaiñ u la ong, “ha ka jingïalang mynta ngi la ïakren ïa ka jingsiew tulop hadien ba ka Sorkar ka la ong ba kan sa pynkiew da 7 percent ïa ka Annual Increment na ka jingsiew tulop kaba mynta. Tang shu ïoh jingtip ïa kane, ma ngi ki nongtrei ngi la khih jingmut namarba ka jingpynkiew tulop ka long kaba rit shaba palat.”
“Wat ha rilum Garo ki nongtrei jong ka EMRI-108 ruh ki la pynlong ïa ka jingïalang namarba ka jingtyrwa ban pynkiew tulop ka long kaba rit shaba palat,” long u Bah Kharraswai.
“Ngim hun ïa ka jingpynkiew tulop kaba 7 percent bad ngi la rai la kumno kumno ka Sorkar kaba la pynïaid hi ïa ka EMRI-108 kan ai ka One Time Enhancement mynta shi snem bad kan sa ai pat da ka Annual Increment manla u snem, ïa kata ngi pdiang,” u la ong bad bynrap, “ïa ka rukom siew tulop jong ngi ba ladep pynkhreh ngin sa rah sha ka Sorkar bad lada kam pynkiew ngim banse ban ïaid da kawei pat ka lynti,” la ong une u nongïalam ka MEMRIWU.
U la ïathuh ruh ba ka jingïalang ka la ïakren sani halor ki jingdawa jong ka Union kiba la pdiang da ka Sorkar Jylla khamtam ha kaba ïadei bad ki jingmyntoi jong ki nongtrei, bad khamtam eh ha kaba ïadei bad ka jingpynpaw jong ka Sorkar ban kham pynbun ïa ki nongtrei bad ïa ki kali Ambulance.
Haba kylli, u la ong, “ha ka jingïakren naduh kaba sdang, ka Union ka la dawa ïa ka Sorkar ba kan shimti ban pynïaid hi ïa ka EMRI-108 hynrei ka Sorkar hi ka pyni bun ki daw hynrei watla katta ngi ieh ïa ka jingstad jong ka Sorkar hynrei ka jingdawa ka long beit ba ka Sorkar kan shimti ban pynïaid hi ïa kane ka Emergency Service.”
“Ngi kwah ba ka Sorkar kan pynheh ïa ka jingsiew tulop bad ngin trei ruh hangne da ka jingsuk mynsiem. Ngim kwah shuh ba kine ki jingjia kiba ladep kin dang jia hadien habud. Ngi buh beit hakhmat ka jingstad ka Sokrar ba kan pynbiang ïa ki jingdonkam jong ngi,” u la ong.’ Dang shen, ka Myntri ka Koit ka Khiah ka la pyntip ba ki don 7 tylli ki Kompeni kiba la thep kyrteng ban shimti ïa ka EMRI-108 bad na kine, lai tylli ki la shah jied ban thep ïa ka Tender. Kine ki long ka Global Health Services, ka Medulance bad ka Chikitsa.
“Ka jingkwah jong ngi ïa ka kompeni ka dei ban pynïaid bha ia ka kam shakhmat bad ka Sorkar ka dei ban don beit hapdeng ban bishar. Hynrei haduh mynta hi ngim pdiang ïa ka jingaiti ïa ka EMRI-108 ban pynïaid da ka Kompeni,” u la ong.
“Lada ka Sorkar ka lah ban pynïaid hi ka lah suk namarba la shi snem ka la ïaid beit ka kam,” u la ong bad kynthoh, “ym dei ba ka Sorkar kam lah hynrei ka don da kawei pat ka jingthmu haba ka ai wai sha ka kompani, lehse ka lah ban lolng na ka bynta ka jingïohnong jongno re jongno hynrei ym dei na ka bynta ka jingïohnong jong ka jylla.”
Haba ïathuh ba ka Union ka la wad jingtip shaphang ki lai tylli ki Kompeni kiba thep Tender ban shimti ïa ka EMRI-108 ha Meghalaya ula ong, “ngi la wad bniah, ka Medulance ka don ka dak sniew (Black Remark) ba kam lah ban siew tulop ïa ki nongtrei ha ka por Covid-19. Ngi lap ïa kata ka rekod. Ka Global Health Service ka ïateh lok bad ka UKSSA. Ka UKSSA ba la pynïaid ïa ki 108 Ambulance bad 102 ha Delhi bad ha u 2018 ka la don ka jingïakhih jong ki nongtrei ba ka kompeni kam shym la siew tulop ïa ki nongtrei namarba ka Sorkar kam ai pisa sha ka UKSSA ba ka rukom pynïaid kam ïahap bad ki kyndon pynïaid ba la buh,” la ong u Bah Kharraswai
“Ka Chikitsa ka don hapoh ka jingtohkit jong ka CBI ha Rajasthan ba ka pynïaid ïa ki kali Ambulance. Ka rekod jong kine ki lai tylli ki dei kiba sniew. Ka jingjied jong ka Sorkar ïa kine ki lai tylli ka don eiei sha lyndet. Ngi diaw ban ïohi ba ka Sorkar ka leh bakla ha kane ka jingjied. Lada ka Sorkar ka pynïaid hi kan bha shibun. Ka sorkar kam dei ban ïapeiñ ban aiti ïa ka Emergency Health Services sha ki kompeni ba la don dak sniew,” la dawa une u nongïalam ka MEMRIWU.