Ym hun ki MDC ka liang pyrshah ïa ka rukom bhah pisa ïa ka 16 Finance Commission ha JHADC

Jowai, Nailar 03: Ki MDC ka liang pyrshah hapoh ka JHADC kiba kynthup ïa ki 8 ngut naka VPP bad 2 ngut na ka Congress, mynta ka sngi 3 tarik u Nailar kila leit ban kynduh ïa u CEM bad ïa u Deputy CEM ka Jaiñtia Hills Autonomous District Council halor ka rukom bhah pisa ïaka skim jong ka sorkar kmie sha baroh ki MDC ka Council lyngba ka 16th Finance Commission 2026-2027.
Na ka liang u nongïalam ka liang pyrshah ma A.A Shullai haba ai jingkren sha ki lad pathai khubor ula ong ha kane ka jingleit kynduh ïa u CEM ha ryngkat ka jingthoh, kila dawa jur ba dei ban pyntreikam ïa ka rule jong ka 16th Finance Commission khlem da leh shilling ïa baroh ki MDC.
Ula ong la kumno kumno kum ki MDC ka liang pyrshah ki dei ban ïoh beit haduh 15 percent, ha ka jingïakren jong ki bad u CEM ula kular ban pynbeit ïa kane lyngba ka Committee Joint PP hapoh ka 5 tarik mynta u bnai, u ma Andrew ula kren shai lada don ka jingleh shilliang kim sa shim da kiwei pat ki sien jam ban pyrshah ïa kane.
U ma Jamshaphrang Pohtam ula ong na kane ka 16th Finance Commission baroh ki Constituency ki dei ban ïoh ïaka, khnang ban ïoh pyntreikam ïa ki skim hapoh ki Constituency la jong, kaba phylla pat ynda kila ïoh ïa ka proposal ka jingai bhah sha ki MDC ka liang pyrshah kala duna shaba palat eh na kaba la mang 28.5 klur sha ka JHADC, hynrei kila bhah tang mar 20 lak sha ki. Namar ïa kiwei ki 19 ngut ki para MDC naka liang synshar kila ïoh haduh 1.36 klur marwei.
Kila buh ruh ka jingkyrpad na u CEM dei ban pynïoh beit haduh 50 lak marwei na ka bynta ban pynïaid ïa ki jingdonkam jong ki paidbah haki Constituency, naka liang jong ki kum ki MDC ka liang pyrshah kin ap ïa kane haduh ka 5 tarik bad lada kam urlong kin shim ïa ka sien jam namar kam don kano kano ka jingkdew ha kane ka skim ban pynduna ïa ki MDC ka liang pyrshah.
Ka jingbhah pisa ïa ki MDC naduh ka liang synshar bad kumjuh ïa ka liang pyrshah ki dei ban long kumjuh hi “ngim ailad ïa kum kine ki rukom treikam dei ban pynkut noh shi syndon hapoh ka Council”, la ong u ma Jamshaphrang Pohtam.