Dang ap kaiphod ka KHADC shwa ban shimkam ïa ka jingpyntrei ïa ka Ropeway Project ha Shillong Peak: JAC

Shillong, Nailar 03: Ka Khasi Hills Autonomous District Council (KHADC) ka dang ap ïa ka kaiphod phah tohkit ha ki pulit Enforcement halor ka jingpyntrei ïa ka Ropeway na Riat Laban Shaduh Shillong Peak.
Ïa kane la ïathuh da ki nongïalam jong Ka Joint Action Committee Against the Shillong Ropeway Project kaba dei ruh ka jingthmu ban ïada pynneh pynsah ïa u Lum Shyllong bad ki umbam umdih.
Haba kren sha ki lad pathai khubor hadien ka jingleit aiti jingthoh bad ïakynduh ïa u CEM ka KHADC u Bah Tony Winston Lyngdoh ki nongïalam ka JAC kiba kynthup ïa ka President ka Kong Deborah Marbaniang, ka Dr. Linda B R Marbaniang General Secretary bad kiwei kiwei ki dkhot ki la ong ba ka jingthmu ba ïakynduh ïa u CEM ka long ban kyrpad ban pynsangeh shwa ia ka Shillong Ropeway Project na Riat Laban Shaduh Shillong Peak namar ka jingbym pat ïoh jong ka KEC International Ltd-Tantia Construction Ltd JV ïa ka Laisen khaïi na ka Council.
Ki la ïathuh ba ki nongshong shnong na ki 8 dorbar shnong hapoh Laban Area bad ki khun ki hajar hapoh ka Hima Mylliem ki pynpaw ka jingsngewkhia halor ka jingktah jur kane ka project ïa ki nongshong shnong khamtam hapoh ka sor Shillong baroh kawei.
Kumta ki la kyrpad ïa ki nongshong shnong ka Sor Shillong ba kin ïamih ban pyrshah ïa kane ka project ka ban ktah ïa ka Mei Mariang, ki tylli umbam umdih bad ïa ki khlaw ki btap.
Ki la pynshai ruh ba kim don jingtip eiei halor ka public hearing kaba la pynlong ha u snem 2022 bad kumta naba kim tip shaphang kane ka Project ki khlem mih naduh mynshwa ban pynpaw ïa ki jingpyrshah.
Ki la pynpaw ruh ka jingai khublei ïa u MDC u Bah Ricky Shullai bad kumjuh ruh ki la kyrpad pat ïa u MLA uba dei u Myntri sorkar ba un shimkhia lem ïa kane ka kam naba na ka liang ka JAC ka la dep ban phah da ka jingthoh sha u Bah Sanbor Shullai.
Kitei ki nongïalam ka JAC ki la kyrpad ïa ka KHADC ba kan phah leit jurip ha kaba ïadei bad ka jingtrei namar ka la don ka jingpynkhyllem ïa ki dieng kaba dang ïaid shaid shaid bad ba kan phah lum jingkheiñ la katno tylli ki tynrai dieng ki la dep ban pom bad pynkhyllem.
Ki la kyrpad ruh ïa ka Council ba ka dei ban phah pynsangeh mardor ïa ka jingtei ka jingtrei namar ka jingbym burom bad bym pat ïoh ïa ka laisen khaïi na ka Council bad kumjuh ruh ïa ka jingbym pat ïoh ka No Objection Certificate na ka Hima Mylliem.
“Ngi la kyrpad ïa ka Council ba kan sngewbha ban khot hajir lane khot hearing mar mar ïa baroh ki 7 tylli ki Dorbar Shnong halor kane ka kam, khnang ban ïashai paidbah halor ki dulir ki pata bad ki jingthoh jingtar halor ka jinglong trai ïa katei ka jaka kaba ki lah dep ai wai sha ka sorkar lyngba ka tnat Jngohkai jong ka sorkar jylla,” pynpaw ki nongïalam ka JAC.
Ki la pyntip ruh halor ka jingkam kaba la pynmih jingthoh bad jingpynshai da ka tnat Tourism ba ïa ka jingïalang rai paidbah da ki nongshong shnong lah ong ba ka tnat Jngohkai ha ryngkat ka Riat Laban Dorbar Pyllun ki lah dep ban pynlong ha ka 27 tarik u Nailur, 2022.
“Kumta halor kane ngi na ka liang ka JAC bad ki khun ki hajar ka Riat Laban Dorbar Pyllun ngin ym lah ban pdiang ïa kane da lei lei ruh em. Namar kum ki khun ki hajar ka Hima bad jong ka Riat Laban Dorbar Pyllun hi baroh kawei ngim don jingtip, ngim don bynta bad ngim shym la ïoh jingtip eiei ruh em halor kane ka jingkam kaba lah buh pynban ïa ngi ki nongshong shnong ha ka umdum bad ka bynniaw. Ki dang bun bah kiei kiei kiba ngi kum ki khun ki hajar watla ngim lah ban pynpaw bad kdew lut, ngi sah ha ka umdum kat haduh mynta halor ka Shillong Ropeway Project, bad ki daw hi baroh ki dei namar ki jingbym ailad bad bym pyntip paidbah lem hapoh shnong poh thaw shuwa ban shim ïa kino kino ki rai watla ki ban sa ktah ban buh ha ka jingeh ïa ngi baroh ki nongshong shnong bad ki khun ki hajar ka Riat Laban Dorbar Pyllun ha ki sngi ki por ban wan ruh kumjuh,” pynpaw ki nongïalam ka JAC.