Shillong, Nailar, 29: U Myntri ka Sorkar Jylla uba khmih ïa ka tnat Labour u Bah Shakliar Warjri u la ong ba ka work permit kam donkam satia haba trei bylla hapoh kane ka jylla Meghalaya.
Ha ka jubab ba la wanrah hapoh ka Ingdorbar thawaiñ ha ka sngi Palei, u Bah Warjri u la ong ba ka Meghalaya Identification, Registration (Safety & Security) of Migrant Workers (MIRSS) Act, 2020 ka dei ka aiñ ban pyrkhing bad ban pynthikna ïa ka jingshngaiñ jong ki nongbylla kiba wan nabar ka jylla.
Ka Aiñ ka donkam ba baroh ki nongbylla nabar jylla kiba wan rung shapoh ka jylla ki dei ban ïoh jingithuh, pynrung kyrteng bad ban don jingthoh.
“Da kane ka lynti la ailad ïa ka Sorkar ban buh jingthoh thik pa thik halor ki nongbylla bar jylla. Kane ka aiñ kam pynkheiñ ïa ka hok laitluid jong ki nongbylla bar jylla ne ka pynduh noh ïa ka hok trei bylla ka jong ki,” u la ong.
U Myntri u la ong, hapoh ka Inter State Migrant Workmen (Regulation of Employment and Conditions of Service) Act, 1979, u nongaikam uba kwah ban wanrah da ki nongtrei nabar ka jylla un hap ban pynrungkam ïa ki nongbylla nabar ka jylla da ka jingïarap jong u Kontraktor/Thakedar na kata ka jylla bad un hap ban pyni ïa ka Recruitment License na ka ophis Labour Commissioner jong kata ka jylla khnang ba u nongaikam bad u kontaktor/thakedar kin dup lah ban aikam ïa ki nongbylla kiba wan nabar ka jylla.
Hynrei, u Kontraktor u lah ban pynrung kyrteng dalade hapoh ka Inter State Migrant Workmen (Regulation of Employment and Conditions of Service) Act, 1979, tang lada u la lah ban aikam san ngut shaneng ki nongbylla bar jylla. U la ong, haba bynrap, ba hapoh ka Inter State Migrant Workmen (Regulation of Employment and Conditions of Service) Act, 1979, ïa ki nongbylla bar jylla ym da donkam ban pynrung kyrteng namarba u kontraktor hi dalade u la pynrung kyrteng hapoh kane ka Aiñ.
Hapoh, ka Meghalaya Identification, Registration (Safety & Security) of Migrant Workers (MIRSS) Act, 2020, u la ong, ba ki nongbylla bar jylla ne u nongaikam u dei ban pynrung kyrteng ïalade lane lada dei pat ïa u nongaikam, baroh ki nongtrei bylla kiba trei hapoh jong u shimet, hapoh ka Meghalaya Identification, Registration (Safety & Security) Act, 2020.
