Shillong, Ïaiong 24 : U Myntri ka tnad Public Health Engineering (PHE), u Marcuise N Marak ha ka sngi Palei u la ong ba kam don satia kata ka bamsap ha ka jingpyntrei ïa ka skim Jal Jeevan Mission (JJM) ha ka jylla.
U Myntri ha kajuh ka por u la kyntait ruh ïa ka jingkynthoh jong u MLA ka Rajabala, u Dr. Mizanur Rahman Kazi da kaba ong ba ka jingkren jong u kadei ka bym don nongrim namar ka jingtrei ka dang ïaid shaid shaid na bynta katei ka projek.
“Ki jingkynnoh bamsap ki lah ban don hangne hangtai hynrei ka rukom pyntrei ïa ka JJM ka long ba ynda la dep ka kam kan sa don pat ka kynhun laitluid kaban wan jurip bad sa ai jingbit pat ban pyllait ïa ka jingsiew. Dei tang hangta ba ka sorkar ka lah ban nang bteng ïa ka kam bad ka jingpyllait ïa ka jingsiew sha ki kontraktor. Kumta da kaba leh kumne kam don jaka satia ïa ki kam bamsap,” u la ong.
Ha kawei pat ka liang, u Myntri u la ong ruh ba ka JJM ka kynduh bun bha ki jingeh khamtam da ka jingtyrkhong ki tyllong um.
“Mynta ngi dang ïakhun ban pynim biang ïa ki tyllong um kiba lashha ktah na ka jingtyrkhong bad kiba la paw ruh kum ki tyllong um kiba la donkam ban shimkhia mardor,” u la ong.
Ha kawei pat ka liang, u Myntri ula ong ba ka sorkar ka la hap ban pyndep hapoh u 2028 ïa ka JJM bad kumta na ka liang ka tnad ka hap ban pyndep noh ïa ka ha shwa ka por ba la buh.
