Ym dei ba byrngem ka HNLC hynrei ka sorkar ka la pynkhreh hi ban pynkynriah ïa ki Harijan

Shillong, Lber 18: U Symbud Myntri Rangbah ka jylla uba khmih ïa ka tnat ki kam Pynroi Sor ka jylla u Bah Sniawbhalang Dhar ha ka sngi Nyngkong u la ong ba ka Harijan Panchayat Committee (HPC) ka la pan por ban jubab ïa ka jingkhot sngewbha jong ka sorkar ha kaba ïadei bad ki jingïasyllok ha kaba ïadei bad ki jingpynkynriah noh
ïa ki 342 tylli ki longïng napoh ka Sweeper Colony napoh ka Them ïew Mawlong.
“Ngi kwah ban khot sngewbha ïa ki (HPC) ban ïakren hynrei ki la pan por,” ong u Bah Dhar sha ki lad pathai khubor.
Lah ban pynkynmaw ba ha ka 14 tarik mynta u bnai, na ka liang ka seng Hynñiewtrep National Liberation Council (HNLC) ka la kam ba ka la donkti ha ka jingpynbthei bom IED kaba la jia ha ka 9 tarik mynta u bnai hapoh Them ïew Mawlong bad ka la aipor shibnai ïa ka sorkar ban pynkynriah noh ïa kitei ki 342 tylli ki longïng na katei ka jaka.
Haba kylli shaphang kane, na ka liang u Dhar u la ong ba ka sorkar kan sa leh la ka kam ban pynkutnoh ïa kane ka kam kaba la sah lah slem bha. Katkum ka jingong jong u, u la ong ba dei ruh ban pynkynmaw ïa ki briew ba kane ka kam ka dang dei kaba dang sah hapoh ka ïingbishar jong ka Meghalaya High Court.
“Kane kam dei namar ka jingshah pyntieng kaba wan na ka HNLC hynrei ka sorkar kan sa leh ïa la ka kamram bad ban trei katkum ki rukom treikam kiba dei,” u la bynrap.
Lah ban pynkynmaw ba hadien ba la jia katei ka jingshah pynbthei bom IED, na ka liang ka HPC ka la pan ka jingïarap bad ka jingtuklar jong u Myntri ka Kam Pohïing jong ka Sorkar Pdeng u Amit Shah na ka bynta ban pynlong da ka jingtohkit bad ban tuklar halor katei ka jingjia bad ban pyndep ïa kane ka kam ha ki lai liang.
Halor kane u Bah Dhar u la ong ba kadei ka kamram jong ka sorkar ban pynthikna ïa ki lad jingïada ym tang ïa ki Harijan hynrei jong manla iwei pa iwei I nongshong shnong ka jylla.
“Nga dang shudep kren ïa ki ophisar jong nga bad nga la bthah ïa ki ban pynkynmaw ïa ka HPC na ka bynta ki jingïakren khnang ba ngin lah ban ban ïashong jingïalang noh mardor,” u la ong.
Haba kylli, na ka liang u Bah Dhar u la pynpaw ïa ka jingkyrmen ba ka sorkar kan lah ban pyndep bad ban shim ka rai la kumno kumno ha kane ka jingïalang ka ban sa long shen.
“Da ka jingïalang ka ban sa long la kumno kumno ngi dei ban shim noh ïa ka rai naba baroh lah dep ban pynkhreh da ka sorkar. Ha ka jingïalang ban sa long lada kam long kaba la rai khatduh hynrei kan dei ka lynti jong ka rai kaba khatduh,” pynthikna u Bah Dhar.