Ka jingpynshitom ïa ki kam bom shnong ka long ka phatok shirta jingim ne ka rai shah pynïap

Shillong, Lber 18: Ka kam ba shah bom shnong da u paidbhur ne ka Mob Lynching tang da kaba ai ïa kiba bun kidaw ka la dei kawei na ki mat ïatai nia kaba la thnam bha hapoh ka ïingdorbar Thaw Aiñ jong ka ri ne ka Lok Sabha ha u bnai Nohprah jong u snem ba la dep hadien ba na ka liang ka sorkar Pdeng NDA ba la ïalam da ka BJP ka la wanrah ïa ka jingpynkylla ïa ki lai tylli ki bill kiba la tip da ki criminal code bill, ha kaba ïa kane la wanrah da u Myntri ka tnat ki Kam Pohïing u Amit Shah u la ong ba hapoh kine ki aiï ban pynshitom ïa ki runar ka sorkar ka la kynthup ïa ki kyndon kiba dei ïa ka jingshah pynshitom kaba long da ka jingshah pynïap ïa kito kiba donkti ha kine ki kam runar ba bom shnong da ki paidbhur (crime of mob lynching).
Ha kane ka jingmynjur jong ka Lok Sabha ïa kitei ki aiñ ne criminal laws kidei ka Bharatiya Nyaya (Second) Sanhita, ka Bharatiya Nagarik Suraksha (Second) Sanhita bad ka Bharatiya Sakshya (Second) Bill.
ïane ka Bharatiya Nyaya Sanhita kan mih bujli ïa ka Indian Penal Code-1860, ka Bharatiya Nagarik Suraksha Sanhita kan mih bujli ïa ka CrPC jong ka 1973 bad ka Bharatiya Sakshya Bill kan bujli ïa ka Indian Evidence Act jong u snem 1872.
Ha kaba ïadei bad ka kam mob-lynching ne ki kam shah bom shnnong tang na kino kino ki daw ba suba sniew, kane ka Bharatiya Nyaya Sanhita ka bynrap ba ki kam shah pynïap lane kano kano ka jingpynmynsaw kaba la donkti da ki 5 ngut ne palat ïa ka 5 ngut ha kano kano kano ka jingjia ka la dei lypa ka kam kaba la pynkheiñ aiñ.
Ki jingshah bom shnong kiba don ka jingïadei bad ka jait bynriew, ka kyrdan ki jait briew, ka jinglong kynthei ne shynrang, ka kyntien ba kren lane ka jingngeit shimet, ka jingshah pynshitom kaba ïadei bad kine ki kam pynïap briew kan dei ka jingshah set patok kaba shyrta jingim ne ka jingshah pynïap.