Shillong, Lber 18 : Ka jingkhaïi tuh ïa ka shini bad piat ka la nang jur mynta nangne na khappud Meghalaya sha Bangladesh. Kane ka la paw pyrthei bha hadien ka jingshah siat iap uwei u nongkhïi shini beaiñ ha ka shnong Dalia East Khasi Hills myn ha ka 1 tarik Lber uba kyrteng u Asen M Marak. Kane ka jingjia kala jia tang kumba 300 metre na khappud kaba ym pat ker sainar shiah. La ïathuh ba uwei u paralok jongu ruh u dei na kjat tangba ki pulit ki dang thwet ban lap dien ïa u.
La kynnoh ba kane ka jingkhaïi beaiñ ïa ka shini bad piat ka dei ruh kaba la ïadonkti da ki BSF bad ki heh ka Land Custom ruh.
Haba u nongthoh khubor u ïakren bad ka Secretary jongka Meghalaya Importer and Exporter Chamber of Commerce ka kong Dolly Konglah ka la ïathuh ba kane ka jingkhaïi beaiñ ka long haba shit ba shai bad kaba la ïohi tyngkreiñ ruh da ki bor sorkar naduh ki BSF, ki briew ka Land Custom bad ter ter.
“ Leit sha Tamabil phin ïohi ïa ki trok kiba ïeng laiñ kiba la kit ïa ki byrni shini bad piat bad kumno ki ïoh ban rung suk sha khappud bad la ïarap ïaki da kito kiba dei ki nongpahara ha khappud hi” ong ka Kong Dolly.
Haba la kylli hato ki don ki kot ki sla ha kane ka jingïakhaïi, ka la jubab “ Ki kot aiu, ki khaïi tuh haba shit ba shai. Kine ki nongkhaïi beaiñ ki don ruh la ki lynti ïaid jongki kiba la pynjulor ym tang ïa ki bynta khappud hynrei wat ïa ki pipe um, ïa ki tyllong um namar ki trok ki ïaid nalor jongki. Kane ka nongkhaïi dewiong ba la rim bha sha Bangladesh ka la ong ba kane ka jingjur ka jingshalan tuh ïa ka shini bad piat sha Bangladesh ka dei namar ka jingkiew kynsan ka khajna ha Banladesh na ka 1 BD Taka sha ka 35 BD Taka bad kane ka la pynlong ïa nongkhaïi beaiñ ban ïoh shim kabu bad leh katba mon.
Ia ka shini la thied na Shillong bad Assam ha ka dor 50 tyngka shi kilo bad khaïi beaiñ sha Bangladesh ha ka dor 140 tyngka shi kilo.
