Nongstoiñ, Lber 18: U District Election Officer (DEO) ka West Khasi Hills Garod LSN Dykes ha ka sngi nyngkong, u la kyntu ïa ki paidbah ba kin ai jingtip lada don kano kano ka jingthong pisa ha ka elekshon Lok Sabha ka ban long ha ka 19 tarik Ïaiong.
Ha ka jingkyntu, u Bah Dykes u la ong ba haba pyntreikam ïa ka jingbthah jong ka Election Commission ka Ri India, la pyntip sha ki paidbah ba kano kano ka jingtyrwa pisa, kyiad, jingai sngewbha ne ka bam ei sha ki nongthep vote ha ka por elekshon ka dei kaba khein kum ka jingthong.
Baroh ki briew, kiba tyrwa bad kiba pdiang ïa kine ki jingthong, kin ngat ha ka jingpynsajia da kaba set along haduh shi snem bad ka kuna. U pyntip ba la dep thaw mynta ïa ka kynhun Flying Squad bad kynhun peitngor ba kin peit pyrman halor ki kam kiba ïaid ha ki sngi ïalap elekshon.
“La kyntu ba kino kino ki briew ki lah ban pyntip ïa kum kine ki jingjia (thong) sha ka Complaint Monitoring Cell, ba la buh ha ka District lyngba ka toll free number 1950 bad C-Vigil”, ong u DEO.
