Wer u Minister Samla ban peit lem ïa ki jingeh ki Samla na u Drok

Shillong, Nailur 18: Ka Balang Unitarian mynta ka sngi, ka la rakhe kynmaw burom ïa ka lyngkhuh snem ba 136 jong ka, da kaba pynlong ïa ki jingïaseng ha ki Balang bapher bapher kiba don ha ka jylla.
Kawei na ki jingrakhe kadei kaba la pynlong ha ka Balang Madan Laban, ha kaba la wan ïashim bynta lang da k inongïalam niam bapher bapher jong ka jylla. U Bah Kyrmen Shylla, uba long u Myntri jong ka sorkar jylla u la long u Kongsan bad u Bah Sanbor Shullai, u la long u Symbud Kongsan.
Kane ka jingrakhe ka la sdang ha ka por mynstep ha kaba u Moderator, u Bah Danny Langstieh, u la thang ïa ki sharak bad ki Kongsan ki la thang ïa ki mombati.
Ïa ka khubor lyngkhuh snem ha kane ka sngi la sam da u Rev Derick Pariat.
U Bah Kyrmen haba kren ha kane ka jingrakhe u la pynkynmaw ba dei ha ki Balang ba ki paidbah ki shem ïa ka jingïaiet ka jingïamap bad ka jingïalong kawei bad kaei kaei kaba mih na ka Balang namar ba ka don ka jingïaieit kadei ban long kaba bha. U la pynkymmaw ruh ba kine ki sngi kiba mynta kidei ki sngi ki mad ïa kiba bun ki jingeh bad ki jingïaleh bad kadei ka kam jong ka Balang ban peit bad ban ïaleh pyrshah ïa kine ki jingeh. U Bah Kyrmen u la khot la wer ruh ïa ki Balang ban peit kyrpang ïa ki Khun Samla kiba la shah lynshop ha ka jingwan kyrthep jong u drok ha kine ki sngi ba mynta. “To ngin ai ka kti jong ngi ban ïarap lem na ka bynta jong ki, khnang ba ngin lah ban ïalam ïa ki ha ka lynti kaba dei”, u la ong.
Ïa kane ka sngi la pynshit rhem ruh da ka jingrwai Choir jong ka Balang.
Ïa ka Balang Unitarian ha Ri Khasi Jaiñtia la seng da u Hajom Kissor Sing ha ka 18 tarik u Nailur jong ka snem 1887 bad ka la kylla long ka Balang Unitarian ba nyngkong eh ha ka thaiñ shatei lammihngi jong ka ri India.