Shillong, Nailur 18 : Ka Shillong Press Club (SPC) ka la pynpaw ïa ka jingbitar bad ka pynrem jur ïa ki runar kiba la donkti ha ka ban pynjulor ïa ka kali jong u dkhot ka SPC ha ka por shiteng synnia kaba la jia ha ka 15 tarik u Nailur ha Mawpat Circle 3.
Watla u trai jong ka kali ula pyrshang ban wad ïa kitei ki briew kiba la leh ïa katei ka kam dusmon,hynrei ym shym la lap ksai satia, kumta ula leit ujor sha ka Dorbar Shnong Mawpat bad ula ai ejahar ruh ha ki pulit jong ka Nongmynsong Beat House.
Ka Shillong Press Club ka kyntu jur ïa ka Dorbar Shnong Mawpat bad ïa ki pulit ba kin tohkit mardor, ban lap bad dei ban kem mardor ïa kine kiba donkti ha katei ka kam khawpud, khnang ba ki paidbah nongshong shnong kin shngaiñ, la pynpaw u President ka SPC u bah David Laitphlang bad u secretary Bah Powell Sohklet.
