Shillong, Nailur 18 : Ka Khasi Student’s Union (KSU) hynne ka sngi ka la leit ban kynduh markhmat ïa u Symbud Myntri Rangbah, Bah Prestone Tynsong ban dawa ba un phah weng noh mardor ïa ki ktem BSF kiba don ha Sonapyrdi, Ratacherra bad ha Hingaria bad ruh ban pynieng noh da ki khyrdop talasi mynderha shi lynter ka surok bah National Highway – 6 ha East Jaintia Hills.
Haba kren bad ki lad pathai khubor, u President ka KSU East Jaintia Hills, Bah Streamly Suchen u al ong, “Ngi kyrpad ba phin tuklar lang bad phah weng noh ïa kitei ki ktem beain jong ki BSF bad pynkynriah noh sha ki jaka khappud ba kham kyndong jong ka Ri namar ka jingpynsyier bad ka jingpynrit mynsiem jong ki paid khappud khamtam kito kiba sha ba don kitei ki ktem BSF ha Sonapyrdi, Ratacherra bad ha Hingaria.”
U la ïathuh ba ki la pynsngew ruh ha u Symbud Myntri Rangbah ba ki la don bun bha ki jingujor ïa ka jingleh donbor jong kitei ki BSF ha kitei ki jaka.
Katkum ka jingong jong u, ka jingpyndik kynthup naduh ka jingtohkit, ka jingkhynra kaba man ka por ïa ki kali ba ka jingbym burom shuh ïa ki paidbah ka la ktah bha ïa ki paidbah ha katei ka thain. “Kane ka la wanrh ïa ka jingsyier, ka jingrit mynsiem ha ki nongshong shnong namar ka ktah ïa ka jingim jong ki kaba man ka sngi,” ong utei u heh KSU da kaba bynrap ba dei tang da kaba weng noh ïa ki kaba lah ban weng ïa ka jingsyier jingrit mynsiem jong ki paidbah.
Ha kajuh ka por ka seng ka dawa ruh na ka sorkar jylla ba kan buh noh da ki khyrdop talasi mynder ha shi lynter ka surokbah NH-6 khamtam eh kum ha Tongseng khnang ban ïoh tehlakam ïa ka rung ka mih beain ki briew na Bangladesh. La kam ruh ba ka seng ka ju ïoh ban bat ïa ki briew kiba suba ba ki wan na Bangladesh.
U la ïathuh ruh ba la bunsien bha ki dkhot ka seng bad Dorbar Shnong ki ju ïa kynduh ïa kum kitei kik jingjia. “Ka jingïohlad ki mynder ban rung ka la buh ka jingma kaba khraw namar lada ki lait suk ki lah ban leh bun ki kam kiba buh jingma,” u la bynrap biang.
U la kdew ruh ba ka jingshah pynïap dang shen jong kawei ka longkmie ka la pynpaw shai ba ki khyrdop kiba don mynta kim pat biang pura ban teh lakam ïa ka rung ka mih jong ki mynder na katei ka thain.
