Ngam don jingthmu ban leit pynïasoh bad ka NPP dei tang ki khubor hamsaia ong u ma Pala

Shillong Nailur 18 : U President ka Meghalaya Pradesh Congress Committee (MPCC) u Bah Vincent H Pala uba long ruh u MP jongka Shillong Parliamentary Constituency sha ka ïing Dorbar Thawaiñ Lok Sabha ula ong, ba um don jingthmu ban leit pynïasoh noh ïalade bad ka seng National Peoples Party (NPP) kumba la saphriang ki khubor ba un pynkhreh ban ïakhun ïa ka elekshon MP Lok Sabha 2024 na kane ka party. U la ong kane ka long tang ka khubor hamsaia bad ka bym shisha satia.
“Ngam don jingmut ei ei ban leit pynïasoh bad ka NPP, nga lah ban don ka jingïadei bad jingïajan bad kino kino ki Seng Saiñ Pyrthei hynrei kam mut pat ba ngan leit pynïasoh noh bad ki” ong u Bah Vincent Pala.
“Ynda la jop ngi hap ban ïatreilang na ka bynta ka bha ka miat jongu paidbah. Nga uba don ha ka liang pyrshah nga hap ban leit sha ka liang synshar ban kyrpad ban wanrah ïa ki kam pynroi bad teng teng kiba don ha ka liang synshar ki wan sha ngi ban pan ïa ka jingkyrshan ha kano kano ka bynta, kumta ngi hap ban ïadei bad ngi hap ban ïatreilang. Kumta ki briew ki jong ngi kim dei ban sngewthuh bakla” ong u Nongïalam ka seng Congress.
Ula ong ba ka jingïadei bad kino kino kam dei satia na ka bynta ka kam shimet bad kam mut ba ka jingïajan bad u Conrad Sangma ne Metbah Lyngdoh un leit noh bad um dei uta uba lah ban shu pynbiej kulmar.
Ha kaba iadei bad ka jingsaphriang ki khana ba dei ban pynrem noh ïa u MP ba mynta na ka Shillong Parliamentary Seat, u Bah Pala ula ong, “Man la ka elekshon kan mih beit kane hynrei kane baroh kan shong ha u paidbah, ngi kiba la ïaleh ïa ka elekshon ngin ïaleh beit kumta baroh kan shong ha ki paidbah ym ha ki nongïaleh ïa ka elekshon. Nga la pyrshang ban treikam hynrei baroh kan shong beit ha u paidbah”.