Na ka jingïakob khwai, shah kynthoh jur ki bor ka District ka West Khasi Hills

Nongstoiñ, Nailur 18: Hadien ka jingjia kaba la jia ha ka sngi saitjaiñ ha pung Pamphyrnai kaba don ha ka shnong Ksehkohlong harud ka surok bah Shillong Nongstoiñ, mynta pat ka West Khasi Hills District Administration ka don hapdeng ki jingshah kynthoh ba bun rukom.
Lah ban pynkynmaw ba ha ka sngi saitjaiñ da ki hajar ki rawon bad ki riew paidbah na kylleng ki District kum na East Khasi Hills bad na ki lai tylli ki District ka West Khasi Hills, ki la tuid sha katei ka jaka ïakop khwai ha Pamphyrnai, hynrei kaba la wanrah ruh ka jingjia ba sngewsih ha kaba la duh noh ïa ka mynsiem jong I khunlung ba dang shu kha.
Ka jingjia ka dei ruh na ka jingsahkut blok da ki bun bun kynta, ka la wanrah ruh ïa ka jingkynthoh kaba jur bha na ka liang ki nongshong shnong jong ka don ka thaiñ baroh kawei, kiba la kren bad kdew kti beit ïa ki nongpynïaid bad ki bor ba dei khmih ki bym shym la shim khia lane shim ki sien jam kiba biang shwa ban pynlong ïa katei ka lympung ïakop khwai.
Ka seng Hynñiewtrep Youths’ Council North West Khasi Hills District, Federation of Khasi Jaiñtia and Garo People West Khasi Hills bad ka Ri Khasi Sepngi Federation, ki la dawa na ka District Administration ban khot hajir bad dawa jingshai na ki nongpynïaid ïa katei ka lympung bad ban pynshitom ruh katba shong ka aiñ.
U President ka seng HYC samla Shembor Langrin u la buh jingkylli ruh ïa ka District Administration ba hato balei ka shah lane ai jingbit ban pynlong jingïakop khwai harud ka surok bah kaba la wanrah ïa ka jingthut ïa ka leit ka wan ki paidbah.
U Bah Chandra Nongdkhar President FKJGP u la ong ba ka seng ka pynrem jur ïa katei ka jingjia ha ka sngi saitjaiñ. Ka seng ka dawa ïa ki nongpynïaid ba dei ban siew bai lutksan sha katei ka longïing kaba la ngat ha katei ka jingjia. Kumjuh ruh ka sngewkhia ïa ka jingai jingbit jong ka District Administration, ban shah pynlong ïakop khwai ha rud surok. Ka seng ka dawa ba ki bor synshar District ki dei ban shim ka jingkitkhlieh bad ban ym ai jingbit shuh kum kine ki lympung ban pynwit ïa ki paidbah.
Kumjuh ruh u bah Mawkordor Kharsyiemlieh jong ka seng RKSF u la ong ba ka por ka la dei ba kiba kum kine ki jingïakop ha rud surok bah bad ki jaka ïaid lynti ki paidbah dei ban khang syndon. U la ong ruh ba u tip shai ba ki don bun ki longïing kiba ïa pait ïa pra tang na ka daw jong kane ka jingïakop khwai.
U la ong, “Ka bai rung ka long haduh Rs 3000 haduh Rs 3500 shi ryngwiang bad kane ka pisa kam dei shuh kaba rit, namar kiba kham bun hi kiba leit sha kine ki jaka ïakop khwai ki dei kiba wan na ki longïing ba duk”.
Kine ki seng ki la ther ruh ïa ka tnad pulit ka ba nalor kam shym la lah ban pynïaid beit ïa ka leit ka wan ki kali, hynrei leit ïa sboh bad don bynta ruh ha jingpynbeit ïa kop khwai ban pynbna ïa ka kyrteng jong ki nongjop.
“Ha ka uniform, ki pulit thik thik ki don bynta ban leit ïa shim slip pule slip bad pynbna ïa ka kyrteng kiba jop. Kane ka long kaei kaei ka jinglehraiñ ïa ka tnad pulit baroh kawei bad na ka liang u Superintendent of Police bad ki bor ba halor ki dei ban shim jingkitkhlieh halor kane,” ong u samla Shembor Langrin.
Lah ban pynkynmaw hangne ba ka kmie jong I khun ba la khlad noh kata I kong Daphiralin Jyrwa na Mawthawñiaw, ka la kha ïa I khun shynrang tourist taxi. Kane ka longkmie kaba shah sumar ha Holy Cross Hospital, Mairang ka la pynpaw ïa ka jingsngewsih kthang ba ka la duh noh ïa u khun shynrang tang na ka daw ka tamasa jong kiwei pat.
“Nga kyrmen ba kaba kum kane ka jingjia kan ym jia ïa kiwei pat ki longkmie ha ki sngi ki por ban wan. Nga sngew dei ban kyntu ruh lada long kaba lah sngewbha ban da pynbeit ha ka lynti kaba dei, khnang ba kan ym ktah ïa kiwei pat haba pynlong kum kine ki lympung”, ong ka Daphiralin Jyrwa.
Ka la ïathuh ruh ba ha katei ka sngi saitjaiñ ha lynti ban leit shah sumar bad ïoh khunlung sha Shillong, ka la sahkut naduh Nongspung haduh lai kynta. Nangta wat hadien ba la lait blok ruh dang hap sahkut bïang sa ha Umlieh bad poi Hospital sa haduh ka por 7 baje janmiet.
Watla hadpeng ka jingïai pyrshang jong kiba haïing ban pyllait ïa ka kali, hynrei shibun kiwei pat ki kali kim lah satia ban khih na ka jingsahkut blok, kaba la mih ruh na ka jingshlei jong ki hajar ki rawon bad ki riew paidbah ha surok.
La sakhi ruh ïa kane lyngba ka video clip ba la ïohi paidbah ïa ka jingsahkut kaba la neh slem bha, ha kaba ki paidbah kiba tuid sha katei ka jaka kim shym ailad wat ïa ka Ambulance ruh ba kan ïaid ban poi sha Hospital.
Ha kawei pat ka bynta jong ka khubor la ïoh jingtip ba lashai ka sngi 19 tarik, ki bor synshar District lane ka District Administration, kan shong ïa ka jingïalang ba kyrpang ha kaba kan sa rai kumno ban leh bad shim kam halor ka jingjia ha Pamphyrnai.
Katba na ka liang u Superintendent of Police West Khasi Hills, u la kyntait mardor halor ka jingdon bynta jong uwei u pulit ha ka jingshim slip kumba paw ha ka video, da kaba ong ba u don ha ka duty jong u bad um shym la don bynta ei ei ha katei ka jingïakop khwai.