Mynjur ka tnad pla tyngka ka sorkar pdeng ban kyntiew ïa ka bha ka miat ki Agent LIC

Shillong, Nailur 18 : Ka Tnat Kam pla tyngka jong ka sorkar pdeng mynta ka sngi ka la mynjur ïa ki sienjam ba bun ba ïadei bad ka bha ka miat jong ki agent Life Insurance Corporation of India (LIC) bad ki nongtrei. Kine ki sienjam ba ïadei bad ka bha ka miat ki ïadei bad ki jingpynkylla ïa ka LIC (Agents) Regulations, 2017, ka jingkyntiew ïa u pud jong ka Gratuity, bad ka Uniform Rate of Family Pension bad kiwei kiwei.
Harum kilong ki sienjam ba la mynjur ba ïadei bad ka bha ka miat jong ki agent LIC bad ki nongtrei:
Ka jingkyntiew ïa u pud jong ka gratuity na ka T. 3 lak sha ka T. 5 lak na ka bynta ki agnent LIC. Kan wanrah ka jingbha ha ka rukom treikam bad ki jingmyntoi ïa ki agent LIC.
Ka jinglah ban thung biang ïa ki agent kiba lah ban ïoh ïa ka renewal commission, ka ban wanrah ka jingshngaiñ shuh shuh ïa ki ha ki kam pisa. Mynta, ki agent LIC kim lah ban pynthymmai ïa ka commission halor kano kano ka jingpyndep ïa ka kam hapoh ka agency barim.
La pynïar ïa ka samoi jong ka insurance na ka bynta ki agent na kaba rim kaba long T.3,000- T. 10,000 sha ka T. 25,000 – T. 1,50,000. Kane ka jingkyntiew ha ka samoi jong ka insurance kan long ka jingmyntoi ïa kiba haïing jong ki agent ba la khlad noh, ka ban ai jingmyntoi shuh shuh ïa ki.
Ka bai bam tymmen ka longïing ha ka dor kaba ryntih kaba @70% na ka bynta ka bha ka miat jong kiba haïing jong ki nongtrei LIC.
Palat 13 lak ki agent bad palat 1 lak ki nongtrei, kiba don ka bynta kaba kongsan ha ka jingkiew ka LIC bad ka jingkhlaiñ ka jingdon ka insurance ha India, kin ïoh jingmyntoi na
kine ki sienjam.