Ujor ka KSU ha u DyCM ba palat liam ka jingsniew ka surok bah NH-6 ha East Jaintia Hills

Shillong, Nailur 18 : Ka jingsniew palat ka surokbah National Highway -6 ka la pynlong ïa ka KSU East Jaintia Hills ban kyntu ïa u Symbud Myntri Rangbah ka jylla, Bah Prestone Tynsong ban tuklar lang.
Ha ka jingkynduh ïa u Symbud Myntri Rangbah ha kane ka sngi Nyngkong, u President ka seng, Bah Streamly Suchen u laong ba mynta la hynriew taiew naduh ba ki heh ka NHAI ki la kular ha ki nongïalam ka seng ban sdang noh ban maramot ïa ka surok hynrei haduh mynta katei ka surok sniew ka dang neh kumjuh bad ym pat paw satia ka dak ban shna.
“Ki thliew ki syar hapdeng surok kaba la buh jingma ïa ki paidbah nongleit nongwan bad ka pynjulor wat ïa ki kali nalor ba ka wanrah khah khah ïa ka jingtakhuh kali,” u la ong.
Da kaba kdew ba katei ka surok kadei u budlum na bynta ban poi sha ki jylla jong ka thain shatei lam-mihngi jong ka Ri, utei u nongïalam ka KSU u la ong ba ki la kyntu ïa u Symbud Myntri Rangbah ba un tuklar ban phah pynkloi noh ban maramot ïa katei ka surok NH-6.
Ha kajuh ka por ka seng ka kyntu ruh ïa ka sorkar jylla ba kan ai noh da ka Traffic Branch kyrpang naka bynta ka East Jaintia Hills kaban peit na ka bynta ka leit ka wan jong ki kali ha ki surok khamtam naba katei ka distrik ka la nang kiew bad nang khapngiah ha ka jingïaid ka por.