Shillong, Nailur 18 : Uwei u Contractor ula ujor da ka ejahar sha ki Pulit bad ai mukotduma hapoh ka Iingkashari Meghalaya High Court, pyrshah ia kawei ka Executive Engineer jong ka Tnad Public Health Engineering (PHE) haba kynnoh ba ka la dawa pisa ba kot palat T. 1 lak ba kan pyllait noh ïa ka Bill jong ka kam ba u pyntrei na ka skhim Jal Jeevan Mission (JJM).
La kynnoh ruh ba kane ka Executive Engineer ka la dep shim ïa ka song pisa ba T. 30,000 na une u contractor kumba la ïakut hynrei wat la katta ruh, la kynnoh ba ka dang kyntait ban pyllait ïa ka bill namar ka jingkwah ba un siew kham bun.
ïa kane ka Executive Engineer la pynpaw kyrteng ha ka mukotduma bad ka FIR kum ka Kedia G Momin, kaba dei ka Sub Divisional Officer ka PHE ha Bajengdoba, North Garo Hills katba u contractor pat u dei u Tarseng Ch Sangma ba na ka Shnong Rongkhon Songgital, Tura.
Kat kum ka ejahar ba la mudui ha Bajengdoba Police Station ba la pynbud da ka mukotduma ha ïing Bishar Meghalaya High Court, une u Contractor ula pyntip ba ula ïoh ïa ka work order ban pyntrei ïa ka Pre Sedimentation Tank jong ka Akemgre Water Supply Skhim hapoh ka District, kaba la mang ban pyntrei haduh T. 74,64,200/-.
ïa kane ka kam la aiti sha u da ka Executive Engineer (PHE) cum Member Secretary, DWSM Jal Jeevan Mission, North Garo Hills ha ka 10 tarik Lber 2022.
Kat kum ka jingong jong u, hadien ba ula pyndep ïa kane ka project, ka JJM ka la wan ban jurip ïa ka kam, kaba la pynlong da ki liang mamla ba lai (third party) kat kum ki kyndon bala buh bad ïa kane ka jingjurip la leh ha ka 5 tarik u Jymmang 2023 haba la lap ruh ba ka kam ka dei kaba biang nadong shading bad la ai ruh ïa ka syrnot.
“Hynrei haba nga leit ïakynduh ia ka SDO ka Kedia G Momin ban phah pyllait noh ïa ka bill namar ba la dep ban pyntrei ïa ka kam, ka la dawa pisa pynbna haduh T 1 lak halor ka nongrim ba ka hap ban pynlut na ka bynta ban pynkhreh ïa ka bill ha ka kyrdan ka jong ka. Hynrei namar ka jingduna pisa, nga la kyrpad ïa ka ban shim tang T. 30,000 ïa kaba ka la mynjur bad kular ba kan sa pyllait noh ïa ka bill ba T. 74,64,200/- tang hapoh shisngi lane arsngi duh. Nga la siew ïa kane ka pisa ba T. 30,000 lyngba ka Google Pay ha ka 10 tarik Nailar, 2023 hynrei kat haduh mynta, ka la kyntait ban pyllait ïa ka bill jong nga da kaba ai daw ba laiphew jait kynthup ïa ka jingleit donkam shabar ka Jylla” ong u Contractor.
