Shillong, Naiwieng, 26: Ka Uttar Pradesh Tourism ryngkat ka jingïatreilang bad ka Red FM ha ka Lah Sngi u Blei ka la pynlong ïa ka jingïalang ban pynsngewthuh paidbah halor ka jingpynlong ïa ka Maha Kumbh Mela 2025.
Ïa ka jingpynlong ïa kane ka jingïalang ka long ban wer ïa ki riewngeit Hindu kiba buhai shnong ha kane ka jylla Meghalya ban ïashim bynta ha kane ka jinglehniam kaba ju long shisien 12 snem.
Ha ka jingïalang kaba la long ha Heiga Hotel, Shillong ki nongkren ki long ka Reeta Ghosh ka nonghikai ba la ïoh pdiang ïa ka National Award, u Nongsaid aiñ jong ka High Court u Shankar Pandey bad u Spokeperson ka BJP u Arnab Das.
Ka Maha Kumbh Mela 2025 ka dei ka leit pilkrim jong ka niam Hindu bad ka jingrakhe ïa ka kolshor ka ban long ha Prayagraj, Uttar Pradesh naduh ka 13tarik Kyllalyngkot haduh ka 26 tarik Rymphang, 2025.
Ka Kumbh Mela ka dei ka jinglehniam kaba kongsan kaba khring ïa ki million ngut ki riewngeit Hindu na kylleng ka pyrthei.
U Shankar Pandey haba kren ha kane ka sngi, u la ïathuh ba ïa kane ka jinglehniam la ju pynlong shisien manla ka 12 snem ha ki saw tylli ki jaka jong ka ri India.
U la batai, ha Prayagraj, Uttar Pradesh ïa ka Kumbh Mela la ju pynlong ha ka jaka ba ïakynduh lang ka wah Ganges, Yamuna bad Saraswati.
U la ong ba kane ka jingleit riewblei ba shisien 12 snem ka ju khring ïa ki million ngut ki riewngeit jong ka niam Hindu ban leit pynkhuid ïalade ha ka wah Ganges bad nalor ki jinglehniam kiba har rukom ba ki riewngeit Hindu ki lah ban ïashim bynta ha ki jaka bapher bapher kiba don ha ka jylla Uttar Pradesh.
Katkum ka jingbatai jong kine ki nongkren, ki don katto katne ki tarik kiba kongsan na ka bynta ka Kumbh Mela 2025, ka Paush Purnima kaba hap ha ka 13 tarik, Kyllalyngkot, 2025, ka dei ka sngi sdang jong ka tamasa nangta ka Makar Sankranti kaba hap ha ka 14 tarik Kyllayngkot, 2025, ka dei ka sngi kaba bha ha kaba ka sngi bad u bnai ki rung ha u Capricorn bad u Jupiter u rung ha u bnai Aries .
Ka Mauni Amavasya kaba hap ha ka 29 tarik Kyllalyngkot, 2025, haba ka sngi bad u bnai kin rung ha u bnai Capricorn. Ka Basant Panchami kaba hap ha ka 3 tarik Rymphang, 2025, ka dei jingsdang jong ka aiom pyrem. Ka Magh Purnima kaba hap ha ka 12 tarik Rymphang, 2025, ka sngi kaba kyrpang tam ïa ki riewngeit Hindu. Ka Maha Shivratri kaba hap ha ka 26 tarik, Rympang, 26 ka dei ka jinglehniam kaba pyndonburom ïa u blei Shiva.
Ka Kumbh Mela ka dei ka por na ka bynta ki nongleit pilkrim riewngeit Hindu ban wad ïa ka jingpynkhuid ba kynja mynsiem, ka jingrakhe ïa ka kolshor bad ka jingïatylli.
Ïa kane ka tamasa ka long ruh da ka jingleit sum ha ki wah ba kyntang, khamtam ha ka jaka ba ïakynduh ka wah Ganges, ka wah Yamuna bad ka wah Saraswati ba la paw ha ki khanatang.
Ha kane ka Kumbh Mela ka don ruh kata kaba ki khot ka Shahi Snan lane ka sum Syiem, ha kaba ki nongleit pilkrim ki pynlong ïa ka jingïaid proseshon kaba heh ban leit iuhkjat bad ban ngam ha ka wah ba kyntang.
