Wer ka DSO sha ka Freedom Run

Mairang, Risaw, 19: Ka ophis jong ka District Sport Officer bad District Sports Promoting Society, West Khasi Hills, kan pynlong ïa ka jingïamareh thong lane Fit India Freedom Run kaba 8 kilomitar ha ka 27 tarik mynta u bnai.
Ha u kyrwoh, ka kong Balarina Syiem District Sports Officer, ka la pyntip ba ha ka jingïamareh thong yn pdiang ïa baroh shynrang bad kynthei kat kiba kwah ban ïashim bynta hynrei ki hap ban pynpoi ïa ki kyrteng ha ophis jong u DC Eastern West Khasi Hills Mairang, ha lane shuwa ka 26 tarik mynta u bnai ha ka por long trei bad kiba wan ai kyrteng, ki dei ban wanrah lang ïa ki original birth certificate na ka bynta ban pynshisha.
Na ka bynta kiba wan ai kyrteng hadien katei ka tarik ba la buh yn ym pdiang shuh bad kiba lah ban ïashimbynta kin dei beit tang na Eastern West Khasi Hills District. Ïa katei ka jingïamareh, yn sdang na phyllaw jong ka ophis u Deputy Commissioner Eastern West Khasi Hills District bad baroh ki nongïashimbynta, kin pynpoi lypa shwa ka por 6.00 baje mynstep. Ki buskit na ka bynta ki nong jop ki don lai tylli ba kynthup ïa ki shynrang bad kynthei, kata ba nyngkong Rs 5000 tyngka ba ar Rs 3000 tyngka bad ba lai Rs 2000 tyngka.