Wer I Dr Ampareen ïa baroh ki Seng Saiñ Pyrthei ban ïatrei lang ban kyntiew ïa ka jylla
Shillong, Lber 7 : I Dr Ampareen Lyngdoh I la ïawer lang ïa baroh ki Seng Saiñ Pyrthei ha ka jylla ban ïatrei lang da kawei ka thong ban kyntiew shaphrang ïa ka jylla.
Hadien ba la dep bam smai mynta ka sngi kum ka myntri sorkar, I Dr Ampareen i la pynpaw ïa ka jingdonkam ban ïatrei lang bad wanrah ïa ka jingsynshar kaba skhem namar kumba ka paw ha Khasi Hills ka rai ki paidbah kam long tang ha kawei ka party hynrei lyngkhot lyngkhot bad kane ka pyndiaw mynsiem shikatdei eh.
“ Kumta nga sngew ba la ngi dei na kano kano ka seng saiñ pyrthei ngi dei ban ïatrei lang ban pynïaid shakhmat ïa ka jylla” ong I Dr Ampareen iba long ruh tang ma I I kynthei ban rung ha ka kynhun myntri ba la ïalam da u Myntri Rangbah u Conrad K Sangma.“ Ngi donkam ban ïatrei lang ban pynsted ïa ka roi ka par ha ka jylla ka ban long ka jingmyntoi ïa ki paidbah hi baroh namar tang ka jingïatrei lang ka ban ïalam lynti ban poi sha ka thong” ong I Dr Ampareen.
“Ngi donkam ban pynthikna ba baroh ki mat kin treikam khamtam ban weng ïa ki jingartatien na ki jingmut jingpyrkhat jong ki paidbah ïa ka NPP bad ban leh ïa kane donkam ban trei naduh kaba sdang” I la ong biang
“ Ha nga hi shimet nga sngew ba wat la ngam pat tip kaei ka lyngkor lane ka tnad ka ban tynrong ha nga hynrei tang kawei nga kular ba baroh ki mat kiba sahteng kiba la thrang ban treikam da ki paidbah ki dei ban treikam noh kawei hadien kawei” ong biang ka MLA jongka East Shillong.
I la ai khublei bad sngewnguh ruh ïa u Myntri Rangbah duh ka ri u Narendra Modi uba la wan ban ïadon ryngkat ha ka jingpynsmai ïa ka kynhun myntri ha ka jylla hapoh ka jingïalam u Myntri Rangbah u Conrad K Sangma.
“ Ngi dei ka bynta jongka ri India bad nga da sngewburom haduh katta katta ban ïadon lang ha kajuh ka rynsan bad u Myntri Rangbah duh ka ri namar ka jingdon jongu ka ai mynsiem ïa ngi ba ngin ïa tur shaphrang kum ka ri. Ym don ba lah ban kynnoh ne kynthoh ïa kane ka jinglong sngewrit kaba la pynpaw da u Myntri Rangbah duh jong ngi wat lada u tip kumno ki paid ka jylla ki la ai ïa ka rai ha ka election kaba dang shu kut shen hynrei katta ruh u dang pynlut por ban ïadon lang bad ngi ha kum kane ka sngi bad kane ka pynpaw ba u don ka mynsiem sngewieit bad sngew jan ïa ka jylla Meghalaya bad ki paidbah ki dei ban pdiang ïa kane ka jingshisha” pynkut I Dr Ampareen.