Shillong, Lber 07: U Bah Alexander Laloo Hek, Myntri ba thymmai jong ka sorkar jylla uba la beiñ bha ïa ka sorkar MDA 1, khamtam hadien ba u la shah weng na ka kam Myntri, u la ong ba un dang ïai bteng ïa kino kino ki kam bamsap wat ha kane ka sorkar MDA 2 ruh.
Haba ïakren bad ki nongthoh khubor hadien ba u la dep bam smai, u Bah Hek, uba hap ban ïasam mar arsnem shiteng ïa ka jinglong Myntri ha ka sorkar MDA 2 bad u Bah Sanbor Shullai, MLA na South Shillong.
“Kumba nga la ju kren pyrshah ïa ki kam bamsap, ngan ïai bteng ban kren ïa kane”, la ong u Bah Hek.
Ha shuwa jong kane, haba la kylli halor ka jingïasam marbiang por ïa ka shuki Myntri, u Bah Hek u la ong ba kam dei ïa u ban batai ïa kane, hynrei kan shong beit na ka Seng BJP na Delhi. Hynrei ha ka por janmiet ka BJP ka la pyntip ba ïa ka shuki Myntri u Bah Hek un hap aiti noh ha u Bah Sanbor Shullai hadien ba la kut ka arsnem shiteng.
