Shillong, Lber 07: Ki paidbah nongleit nongwan ha nongbah Shillong ha ka sngi Ba-ar ka la mad mad ka jingsyrtok namar kas jingpyrkhing ïa ka leit ka wan namar ka jingwan u Myntri Rangbahduh ka ri India u Narendra Modi bad u myntri ka tnat kam pohïing ka sorkar pdeng u Amit Shah.
Kane ka jingwan jong u Narendra Modi bad u Amit Shah sha nongbah Shillong kadei ban sakhi ïa ka jingbam smai ki myntri ka sorkar Meghalaya Democratic Alliance (MDA II)
Na ka liang ki bor district ki la pyrkhing haduh katta katta ïa ka leit ka wan ha kaba u u Superintendent of Police (SP) ka East Khasi Hills kala pynmih hukum bym shah ïaid kali ‘No Entry’ ha ki bynta ka nongbah Shillong naduh ka por 10:30 haduh 12:30 baje mynstep.
Ha kane ka por la sakhi ba ki paidbah naduh kiba ñiah kali ki la hap ban ap da ki kynta hadien ba ki bor pynïaid kali ki la phah sangeh ïa ki kali katba u Narendra Modi bad u Amit Shah ki dang don hapoh ïng sah u Lat ka jylla ban sakhi ïa ka jingbam smai ka Kynhun Myntri ka sorkar jylla.
Haba ïakren bad ki katto katne ki nongleit nongwan ki la pynpaw ba kane ka jingwan u Modi kam wanrah jingmytoi eiei hynrei tang ka jingsaja u paidbah.
“Dei ba u wan u Modi keiñ ba ngam ïoh leit klas shuh la bat ïa ngi hangne da plat ar kynta,” ong ki samla pule kiba shong haki kali kamai.
Haba ïakren bad uwei pat u nonghikai skul u bym kwah ban pynpaw kyrteng u la ong, “Kane hi kaba ngi sakhi ka long thik kum ha ka poitry jong u Myllung Kynpham Sing Nongkynrih uba ong ba haba wan u Myntri Rangbah shlei ki siej bad un wan ruh kumba ong u Myllung ba un maham ïa kita ki nongsynshar bamsap hynrei un kut tang ha ka jingkren un ym shim kino kino ki lad pynshitom ïa kine ki nongsynshar bamsap,” u la ong bad u la bynrap shuh shuh, “Ka jingwan jong u shane ka dei beit tang ka rongphong ym eh ba u kwah ïohi ne sngap ïa kaei kaba ki nongshong shnong ki kynduh jingeh, namarkata, lada phi pule ïa kato ka poitry u Myllung Kynpham Sing kaba u la thoh la katto katne snem mynshuwa kan ïadei sbiak bad kane ba mynta bad ka jingwan ki Myntri Rangbah bad kan ïai ïadei ruh ha ki snem kiban wan kumba la kren u Myllung,” u la ong.
“Aiu un ai u Modi sha ka jylla bad kiei kiban pynmyntoi na bynta jong ngi kan kut tang ha ka jingkhmih lynti,” u la kren bynñiaw.
