Shillong, Risaw 10: Ka Hynñiewtrep National Youth Front Southern Border Area (HNYFSBA) ka pynpaw ïa ka jingsngewkhia halor ka jinglait lan ka jingrung beaiñ jong ki khar Bangladesh, ki mynder ri lyngba ki shnong khappud bad ka Bangladesh.
“Ngi sakhi ïa ka jingshah kem jong ki 7 ngut ki khar Bangladesh ha ki 2 bnai mynshwa ha Shillong da ki pulit ka Shillong ha kaba kane ka pyni ïa ka jingsynjor ban tehlakam da ki shipai BSF, namar kata kum ka seng kaba don ïa ka jingkitkhlieh ban ïada ïa ka jingwan tuid kyrthep ki bar jylla sha kane ka ri ba ieid jong ngi bad halor kane na ka liang ka seng ka la shim ïa ka sienjam ban pynïeng da ka khyrdop talasi ïa ki mynder hapoh ka shnong Dangar kaba long kum ka dak ban pynkynmaw ïa ka sorkar khamtam ïa ka tnat pulit ha kaba ïadei bad ka jingwengnoh ïa ki khyrdop talasi ne Infiltration Check Gate kiba don hapoh ka shnong Umpung South West Khasi Hills bad ha Mawsynram East Khasi Hills,” ong ka kyrwoh ba la phah da u President u Bah Kyllang S Thongni bad u Bah Drimshon Mawleiñ Secretary ka seng.
Na ka liang kine ki nongïalam ki la buh ruh ka jingkylli ba balei bad halor kano ka nongrim ba la wengnoh ïa kitei ki khyrdop talasi na kitei ki jaka.
Shuh shuh ka seng ka dawa ba dei ban pyntreikam biang ïa ka khyrdop talasi kaba don hapoh ka shnong Umpung bad ruh ban buh sa kawei ka khyrdop hapoh ka shnong Dangar kum ka jingïada na ka jingrung laitlan ki bar jylla ki bym lah ban ithuh la ki dei kiba nabar ri ne na kiwei pat ki jylla.
Na ka liang ka seng ka la dawa ruh ba dei ban weng shi syndon ïa ki BSF kiba shong dara ha Ladbakli kaba don ha Lad Ranikor naba ka jingdon jong ki ka la pynwit ïa ki paidbah ha ka ïaid ba ïeng lyngba kane ka surok.
