Watla ngi la ïoh ïa u number ban thaw Sorkar ha u 2018 ka BJP ka la thung CM ïa u Conrad : Mukul

Baghmara, Rymphang 1: U nongïalam ka Liang Pyrshah u Dr Mukul Sangma ha ka sngi Balang u la ong ba wat la ka Congress ka dei ka party kaba jop bun tam ki MLA ha u 2018 bad ba ki apidbah ki la ibit ïa ka Congress ban synshar ïa ka jylla hynrei dei ka BJP kaba la knieh jubor ïa kane ka jingkwah u paidbah da kaba wan thung Myntri Rangbah da u Conrad K Sangma.
Haba kren ha ka jingïalang ha Baghmara South Garo Hills u Dr Mukul u la ther tyngeh ïa ka MDA ïa ka buit jakhila jong ka hadien ka elekshon ha u 2018 kumno ban ïoh knieh jubor ïa u lakam synshar na ka Congress.
“Hadien ba la pynbna ïa ka resol elekshon ha u 2018 wat la ngi ïoh ïa u number ban thaw sorkar ki Myntri jong ka BJP na Delhi ryngkat u Myntri Rangbah ka Assam ki la wan khohreh sha Shillong ban pynkhreh thaw sorkar bad kane ka pyni shai kdar ba dei ka BJP ba thung Myntri Rangbah ïa u Conrad. Kane ka sorkar ba la thung da ka BJP kam shym la leh eiei na bynta ka jylla palat ïa ka bamsap na bynta ka jingmyntoi shimet jong ki,” u la ong. U la ong ba ka jingkyrduh kam ha ka jylla ka jubor tam ha kane ka por ba ka MDA ka synshar namar kam don kano kano ka jingpyrkhat na bynta ki khunsamla ka jylla.
“Pyrkhat maphi wat ki samla kiba la dep ban pule engineers bad kiba pas ha ka kyrdan first class ha ka MSC ki aply ha ka kam hikai kontrak bad tang na bynta kawei ka kam ba thylli ruh da ki hajar ki samla kiba aply. Kane ka sorkar u Conrad ngi sakhi baroh ïa ka jingmatlah, jingkyllut, ban jubab ïa ka jingkwah ki samla,” u la ong.
Ha kane ka juh ka sngi u Dr Mukul u la leit ruh ban kren ha ka jingïalang kaba long ha Rambrai ha kaba u la khot ïa ki paidbah ban snohkti lang bad u ban wanrah ïa ka jingïatylli ha ka jylla bad ka ri lynba ka AITC.