Nalor ki Businessman ngi ïoh mynta ïa ki nongmihkhmat da ki Conman: Robert June Kharjahrin

Shillong, Rymphang 01: U Nongïalam jong ka Hynñiewtrep Youths Council (HYC) u Bah Robert June Kharjahrin u la ong ba ka jingrung shaba palat jong ki nongkhaïi (businessman) sha ka jylli jong ka saiñpyrthei kiba don ïa ka jingthmu ban pynïohnong shimet ka la nang pynsniew dur haduh katta katta ïa ka saiñhima sima hapoh ka Jylla.
“Baroh shikatta ka jingrung palat jong ki Businessman sha ka saiñpyrthei da ka jingthmu kaba bym bha, ym baroh ki Businessman ki rung ha ka politic ban pynjot ka la pynsniew. Nalor kata, ngi ïoh ïa ki nongmihkhmat kiba dei ki Conman, kiba shu thok, kiba shukor, kiba lamler katba ïa kaba lap ba shem,” la ong u Bah Kharjahrin ha ka jingïakren bad ki lad pathai khubor.
Haba pynksan ïa kane ka jingkren jong u, u Bah Kharjahrin u la ong, “haba ngi ïakynduh ïa u Myntri Rangbah, haba ngi kylli la jia aiu ïa ka Resolution ILP, hynrei ka jubab ka long ba ka Ministry of Home Affairs ka dang bishar ïa kata. Ynda la wan sa ki Union Ministry jong ka BJP ha Meghalaya, ki ong ai ïa ngi 31 ngut ki MLA ngin sa ai ïa ka ILP.”
“Kano kaba dei, hato ka BJP ka kwah ban ïoh myntoi saiñpyrthei na ka jingdawa ILP lane ka Ministry of Home Affairs ka dang bishar ïa ka?” la kynthoh u Bah Kharjahrin.
“Ym dei tang uwei ne arngut ki Union Minister ka BJP kiba kren ïa kata, hynrei wat ki local MLA kum u Sanbor Shullai ruh la katno sien u la ong, ai ïa ngi shibun ki MLA, ngin sa ai ka ILP, ai ïa ngi shibun ki MLA ngin sa pynïoh ïa ka ktien Khasi, da jop ka BJP u pud u sam yn sa ïa pynbeit noh hapoh shibnai. Kata ki kren. Kano kaba dei?” la kynthoh u Bah Kharjahrin.
“Kam dei ka jingkren jong ka HYC kaba ong ban ïa pynjop ïa ka BJP ban ïoh ïa ka ILP, hynrei ki ong hi ma ki (BJP),” u la ong.
“Dei ki Conman kiba pynjot ïa ka jaidbynriew kiba shu thok laki laka bad namarba la bun than ki Businessman bad ki Conman, ka jingjynjar mynta ka long ba ngim shym la ïoh shuh ïa ki Statesman,”u la ong shuh shuh.
“Ngi kyntu mynta ïa ki paidbah ba kin ym jied shuh ïa ki Conman, ïa ki Businessman kiba don da kiwei pat ki jingthmu,” u la ong bad pynshai ruh ba ka HYC kam pyrshah ïa ki Businessman kiba wanrah ïa ki kam pynroi bad kiba pynmih khajna bad kiba aikam ïa ki paidbah.
Halor ka jingdawa ïa ka ILP, u la ong ruh ba ym tang ka HYC ka khuslai jingmut hynrei wat ka jylla ruh ka don hapdeng ka jingkhuslai jingmut.
“Ban lait noh na kine ki jingkhuslai jingmut ngi donkam ban ïoh ïa ki briew kiba khuid, kiba kren shai bad kiba leh ïa kaei kaba kren, hynrei ym ban shu long Conman da kaba shu thok bad shukor,”u la ong.
Haba kynthoh pat halor ka jingïasoi ïa ka Dulir Ïasngewthuh Jingmut (Memorandum of Understanding) ban ïapynbeit pud hapdeng ka Jylla Meghalaya bad Assam, u la ong, “ki don ki nongmihkhmat kiba ong ba ka MoU ïa pynbeit pud ka dei ka jingïohnong hynrei katba ki briew kiba sah ha khappud kim sngewtynnat ïa kata. Ka jingïakhih ban pyrshah ïa ka MoU kam sdang na ki Sengbhalang hynrei ka sdang na ki paidbah kiba sah ha khappud.”
“Lada ngi bakla ban jied, kaba ma ka long ruh wat ïa ka Meghalaya Land Transfer Act ruh kin weng. Kaba ma ka long wat ïa ka jingpynbeit pud ha ka wat kaba ar ruh kan long sa katno square kilomitar kin ai sha Assam. Mynta ki dang buh ban tih dewiong tang 100 hektar, kaba ma ka long sa tang katno kin ong wat ban kren ruh hap siew khajna shwa sa kren. Ki la kren da kaba shai ba kin buh GST ha ka por ba kren,” la kynthoh u Bah Kharjahrin.