Pan jubab ka High Court na u CS ban kurup ïa ki nongkynti ki ophisar ba ailad ïa ki Karkhana Coke

Shillong, K’lyngkot, 01: Ka Ïingbishar Meghalaya High Court ha ka sngi Balang ka la bthah ïa u Chief Secretary jong ka Jylla ban ai ïa ka Action Taken Report (ATR) lane ka kaiphod aiu ba la leh pyrshah ïa ki Ophisar kiba donkti bad ban kurup ïa ki nongkynti jong ki halor ka jingailad ïa ki karkhana coke be-ain ban treikam hapoh ka Jylla.
“U Chief Secretary u dei ban ai ïa ka kaiphod ha ka sien shong bishar ba nyngkong jong ka Ingbishar ha ka 3 tarik Rymphang 2023, ban batai bniah ïa kaei ka sienjam ba la leh pyrshah ïa ki Ophisar ba donkti, kynthup ka jingai notis ban sospon, ban shong bishar da ka tnad, ban kurup ïa ki nongkynti halor ka jingailad ïa ki karkhana Coke beain ba kin treikam” ong ka Division Bench ha ka hukum ba la pynmih halor ka PIL ba la mudui da u Monu Kuman.
“U Chief Secretary un wanrah ïa ka kaiphod sha ka Ïingbishar bad un hap ban shim jingkitkhlieh ïa kaei kano ka jingtih be-aiñ ïa u dewïong lane ka jingtreikam be-aiñ jong kino kino ki karkhana Coke ha ka Jylla. Kaba sah jong kane ka kam yn sa shong bishar hadien ba la ïoh pdiang ïa ka kaiphod na u Chief Secretary,” ong ka Ïingbishar.
Ha ka Affidavit ba la aiti ha ka 27 tarik Kyllalyngkot, u Deputy Commissioner jong ka West Khasi Hills, u la pyntip ba u ladep tah ïa ki notis khang khyrdep ha baroh 57 tylli ki karkhana Coke bad ladep mudui ruh da ka ejahar ruh ha Shallang Police Station.
Hynrei ka Iingkashari ka la ong, “ka Ïingbishar kam lah ban pdiang ba ka Sorkar Jylla lane ki Heh Ophisar kin ym tip ïa ka jingdon haduh 57 tylli ki karkhana Coke kiba treikam sopsop ha ka por mynmiet tad haduh ba hap khang khyrdep da ka jingpyntreikam ïa ka hukum jong kane ka Ïingbishar hadien ba shong bishar ïa ka Public Interest Litigation (PIL)”.
Da kaba pynpaw ba ka dei ka kamram jong ka Sorkar ban pynthikna ba kam dei ban don kano kano ka kam kaba donkam ïa ka laisen ba kan treikam khlem da ïoh laisen, ka Ïingbishar ka la ong, “ka nongrim ba ka Sorkar ka shim halor ka kam tih dewïong be-aiñ bad ka jingtreikam jong ki karkhana Coke be-aiñ ka dei ka bym ai jinghun satia.”
“Ka dei ka kam kaba pynlehraiñ ba wat hapdeng ki hukum jong ka Ïingbishar Supreme Court, khlem pep, jingtreikam ba kynrum kynram la wanrah da kane ka Sorkar da kaba ïaid lait ïa kine ki hukum bad ïarap pynban ïa ka jingtih be-aiñ ïa u dewïong bad ka jingtreikam jong ki karkhana Coke ba khlem don laisen ha ka Jylla. Ka jingtreikam pathar jong kine ki karkhana Coke be-aiñ ka ïalam sha ka jingtih be-aiñ ïa u dewong ha ka Jylla watla ka Sorkar Jylla ka la kular,” la ong ka Ïingbishar da kaba kdew ruh ïa ka jingujor ba thymmai ba la ïoh pdiang halor ka jingtih dewïong be-aiñ ha South Gro Hills.
U DC ha ka Affidavit u la pyntip ruh ba haba pyntreikam ïa ka jingbthah jong ka hukum kaba 16 tarik Nohprah 2022, la pynmih ïa ka hukum ban leh eiei mardor da kaba ban khang ïa ki baroh ki karkhana Coke be-aiñ kiba treikam ha West Khasi Hills.
“Ha ka jingkhynra, la shem ba kine ki karkhana coke ki la treikam ha ka por mynmiet ha ki jaka kyndong. Ïa kine ki karkhana ladep ban khang khyrdep bad la kurup ruh ïa u dewïong bad ïa u Coke ba la ïoh na kine ki karkhana,” la pyntip u DC.
U DC u la ong ynda ladep thew ïa ka jingdon jong u dewïong bad ïa u Coke ba ladep saiñ yn sa kurup bad yn sa lilam katkum ka kyndon jong ka Section 21 jong ka MMDR Act, 1957. Namar, ka jingdon jong ki mar ba la ïoh kurup donkam ban pynkit sha ka jaka pynlang dewïong jong ka Sorkar, mynta u dang don ha ka jaka ba la ïoh kurup bad hap hapoh ka jingpeit jong ki bor synshar District bad yn sa shalan hadien ba ladep thew ha ka por kaba dei, la ong u DC.
Ka Ïingbishar ka la buh sngi ban shong bishar biang ïa kane ka kam ha ka 3 tarik, Rymphang.