Shillong, Rymphang 01 : Ka media coordinator jong ka All India Congress Committee, ka Bobbeeta Sharma ha ka sngi Balang ka la ong ba u Myntri Rangbah barim ka Jylla, Dr. Mukul Sangma u la bakla jru da kaba leit ban pynïasoh sha ka party thymmai, ka All India Trinamool Congress.
“Da kaba burom ïa u, nga ngeit ba u la leh ïa kaba bakla jur ha ka jingim saiñpyrthei jong u da kaba pynïasoh sha ka TMC,” ong ka Sharma haba kren bad ki lad pathai khubor.
Ka la pynkynmaw ruh kumno ba u PA Sangma u la leit ban pynïasoh sha ka TMC hynrei ka jingïadei jong ki ka dkut noh shiteng por. “Ha katei ka por hi la paw ba ki paidbah ka Meghalaya kim pdiang ïa ka TMC namar kadei ka party nongwei,” ka la bynrap shuh shuh.
Ka Sharma ka ong ruh ba ka Trinamool Congress kan ym jop bun satia ha kane ka elekshon ban wan.
“Ngi la ïoh lum ki jingtip ba kin ym jop bun ha rilum Garo bad ngam tharai ba kin lah ban leh bha ha rilum Khasi. Kumta nga sngew dei ban ong ba u la leh ïa kaba bakla tam ha ka jingim saiñpyrthei jong u da kaba iehnoh ïa ka Congress,” ka la ong.
U Dr. Mukul uba dei ruh mynta u nongïalam ka Liang Pyrshah un ïakhun na ki ar tylli ki constituency, kata na Songsak bad ruh na Tikrikilla ha kane ka elekshon MLA kaban long ha ka 27tarik mynta u bnai.
