Na ka kot sha u syntiew lotus poi u MM Dangngo

0

Shillong, Rymphang 01: U kyrtong ba la pynbna jong ka NPP u Martin M Dangngo ha ka sngi Balang u la leit ban pynïasnoh pura noh sha ka BJP na bynta ban ïakhun ïa kane ka elekshon MLA ban sa long ha ka 27 Rymphang hadein ba ki nongkyrshan jong u ki la rai bad mih noh na ka NPP bad pynïasnoh pat sha ka BJP ha ka 30 Kyllalyngkot 2023.
Haba kren ha kane ka sngi u Martin M Danggo u la ong ba kane ka jingpynïasoh jong u sha ka BJP ka dei beit namar ki nongkyrshan kiba la ju trei na bynta ban pynjop don burom ïa u ha kine ki snem kiba la leit.
“Nga wan sha ka BJP da ka jingmut kaba beit ba ki nongkyrshan jong nga ki la ïasnoh sha BJP bad nga hap bad bud lang ïa ki kyrmen ba da kane ka jingwan jong nga ban ïakhun ïa kane ka elekshon na ka BJP ngan lah ban leh bha bad ban poi sha ka thong ha kane ka kynti kaba mynta,” u la ong haba kren sha ki lad pathai khubor.
U Danggo u ong ba kane ka jingpoi jong u sha ka BJP ka dei ka jingkwah ki nongkyrshan jong u, “bad nga tip skhem ba kin trei shitom ban pynjop ïa nga ha kane ka kynti kaba mynta khang ban lah ban pynurlong ïa shibun bah ki mat kiba ka Ranikor ka donkam,” u la ong.
U la ong ba ka jingmih jong u na ka NPP ha ka khyllipmat kaba khatduh ka don ka jingsngew babe.
“Nga don ka jingsngewbabe namar nga mih na ka NPP ha ka khyllipmat ba khatduh bad nga da burom ruh ïa u Myntri Rangbah hynrei ngan leh kumno haba ki nongkyrshan jong nga ki la ïasoh sha ka BJP nga hap ban shu bud beit ïa ki,” u la ong.
Shuh shuh u la ong ruh ba um shym la don jingbabe satia ïa ka jinghiar shuki noh jong u kum u MLA ka Ranikor namar ka thong ban ïoh ïa ka Civil Subdivision ha Ranikor u la lah ban pynurlong.
“Nga lei ngam kwah shuh ban dang aireng ha kane ka elekshon hynrei dei ki nongkyrshan jong nga kiba kwah ba ngan ïakhun te dei namar ka jingkwah ki nongkyrshan bad ki paidbah hi ba nga iakhun biang ïa kane ka elekshon hynrei nga lei shimet ngam kwah shuh,” u la ong.
Ha kane ka sngi la pdiang sngewbha ïa u MM Dangngo da u Bah David Kharsati u Vice President ka BJP, u Bah Sanbor Shullai u MLA ka BJP bad kiwei kiwei ki nongïalam ka BJP.

Leave A Reply

Your email address will not be published.