Sdang shongshit ka elekshon ha Sohïong, poi NPP da ki phew ngut ki nongïalam ba radbah u Bah HDR

0

Shillong, Rymphang 01 : Da ki phew ngut ki nongïalam ba hakhmat eh jong u Bah HDR Lyngdoh, kyrtong ka UDP na Sohiong ki la leit ban pynïasoh sha ka NPP ha ka jingïalang kaba long ha kane ka sngi Balang ha Umtyrñiut.
Ïa kitei ki rangbah ba kynthup naduh u Working President, Vice President, Secretary bad kiwei kiwei la pdiang burom da u Bah Samlin Malngiang kyrtong ka NPP bad ruh da u MDC ka Sohiong Bah Sherbor Mawlong. Ha kane ka sngi, u Bah Samlin u la pynskhem ruh ïa ki nongkitkam jong ka Umtyrñiut Unit.
Kiba bun ki nongïalam jong u Bah HDR Lyngdoh haba kren ha katei ka jingïalang ki la ïathuh ba ka daw kaba pynlong ïa ki ban wan kyrshan noh ïa ka NPP kadei ba ki ïohi ïa ka rukom treikam jong u MLA ha kine ki san snem la ka long ha ka suk ka saiñ bad ruh ha ka roi ka pa.
U Bah Badon Dohtdong, ba bat ïa ka kam Secretary bad u Bah HDR u la ong ba kaba khring ïa u ban wan treilang bad u Bah Samlin kadei hadien ba u ïohi ïa ka jinglah jong u mar ïa jop ban pynbeit ïa ki kynrum kynram kiba don ha kiba bun ki shnong ki thaw. Katkum ka jingong jong u, ha shwa u 2018 ki don bun ki shnong kiba la shu synshar khlieh briew namar ha kawei kawei ka shnong la don lai saw ngut ki rangbah shnong.
“Hynrei mar ïa jop u Bah Samlin la pynbeit lut ïa kitei ki kynrum kynram baroh bad ka shongsuk shongsaiñ ka la ïoh ban synshar,” u la ong.
U Bah Phrang Kharpan uba bat kum u President ka Block ha ka por ba u don bad u Bah HDR u la ïathuh ba dei na ka rukom treikam kaba pynlong ïa ki ban sdang ngiah lut. U ong ruh ba na ka thaiñ jong u kaba u Bah HDR u khlaiñ bha, mynta haduh 14 ngut ki nongïalam ba radbah ki la poi sha ka NPP, arngut ki dang neh sha u Bah HDR bad katto katne pat sha ka Congress.
U ong ruh ba kawei pat kaba khring ïa u, kadei ba u ïohi ba ha ka sien kaba nyngkong eh ba ka Sohiong constituency kan sakhi ba ïa ka skim MLA la sam ha khmat u paidbah ba bun.
U Bah Balan, u kyrtong ka PDF ba ïakhun ha ka elekshon MDC ha u 2019 u la ong ba baroh shi katta ki paidbah ki kynthoh khlem pyrkhat da kaba ong ba ka party NPP kadei ka party Garo.
“Ki nang tharai ba ka rilum Garo ka don sha America katba kim tip pat ba ka Congress kadei kaba na Delhi,” u la ong.
U Working President ka UDP Sohiong, Bah L Kharbani pat u la ong ba ka jingleit pynïasoh jong u Bah HDR sha ka UDP kadei namar ka Congress kam ai tiket shuh ïa u. U ong ruh ba ba lada kren pat ïa ka jingkylla, ha ki 25 snem kum u nongmihkhmat, utei u MLA barim jong ki um shym la lah satia ban wanrah tang kawei ruh ka stadium kumba lah u Bah Samlin tang ha ki san snem.
“Nangne shakhmat kin dang bun kiban wan pynïasoh sha ka party,” u la ong.
U Dr. KD Ramsiej uwei na ki radbah jong u Bah HDR Lyngdoh na ki thaiñ Shilliang -Um, haba pynshai halor ka jingkynnoh ki liang pyrshah ba ka NPP kadei ka party na rilum Garo, u la ong ba katba ym pat lah ban ïoh la ka jong ka state, yn ym lah satia ban pynïakhlad ïa ka Jaidbynriew Khasi – Jaiñtia bad Garo.
“Kiwei ki party ki kynmawe party tang ha ka por elekshon hynrei kiwei pat kum ki National Party ki ïarap lem ïa ki nongkyrshn kiba trei ha ki constituency bym don MLA. Hynrrei ki party riewlum ki kynmaw party ne nongtrei party tang ha ka por elekshon,” u la ong.
Na ka liang u Bah Samlin haba kren kum u kyrtong u la kyntu ïa ki nongtrei party ba kim dei satia ban pynsngap ïa ka jingkynthoh jong ki liang pyrshah kiba la kynthah bad kadiang bad kamon ha ki rynsan ïalap elekshon ïa u kyrtong jong ki.
U la pynpaw ruh ïa ka jingkmen ïa ka jingwan kyrshan lang jong kitei ki nongïalam ba radbah jong u Bah HDR Lyngdoh ban trei borbah na ka bynta kane ka elekshon. “Nga kyrmen ba da ka jingtrei lang jong baroh ryngkat bad kine ki rangbah kiba wan mynta ngin lah ban jop bad tam kham bun shuh shuh ha kane ka elekshon,” u la ong.
U Bah Samlin uba dei ruh u Myntri barim ka sorkar jylla u la ïathuh ba ki buh thong ba ka Sohiong constituency kan dei kawei na ki constituency kaban pyndap lang ïa ki 20 tylli ki constituency ba ka NPP kan jop na rilum Khasi bad Jaiñtia ynda la dei ka sngi ñiew vote.

Leave A Reply

Your email address will not be published.