Shillong, Rymphang 01: Ki dkhot ka Lum Sohpetbneng Committee jong ka Seng Khasi Kmie, Mawkhar Shillong, ki la khot lawer ïa ki para kur para kha najan bad na jngai ka Bri u Hynñiewtrep Hynñiaw Wasa ba kin wan shim bynta sha ka Kiew Pyneh Rngiew sha u Lum Sopetbneng kaba shisien shisnem, kaban long haka 5 tarik u Rymphang 2023.
Haba ïakren bad ki lad pathai khubor, u Vice President ka Lum Sohpetbneng Committee u Bah Païa. B. Synrem, u la wer ïa ki parakur parakha ba kin ïa wan sha kane ka kiew pyneh rngiew, bad u la ong ba kane ka jingkiew Pyneh Rngiew la lah ban shim bynta paidbah hadien ar snem ba ym shym la lah ban pynlong ïa ka kumba ka juh dei ban long namar ka jingwan lynshop ka pang Covid 19.
U Bah Païa u la ong ba wat la la shah ban shim bynta sha kane ka Kiew Pyneh Rngiew, hynrei ka komiti ka la pynbna artad ïa ki kyndon ba kan pyntreikam ha kane ka sngi ban pynsuk ïa ki paidbah ba wan shim bynta.
“Ngin nym shah palat ïa ki kali ba kin kiew shaduh kliar jong u Lum Sohpetbneng, la kyntu ïa ki nongwan ba kin kiar ha kaban pynjaboh ïa ki sawdong ki sawkun bad ïa ki bynta ba marjan jong une u lum kyntang bad ki jaka ba marjan, la mana bym dei ban sliew ne thang ding ha ki jaka long khlaw, bad ïa ki song jingbam ym dei ban bret pathar ïa ki,” ong u Rgh Païa.
Shuh shuh la kyntu ïa ki nongwan kiew pyneh rngiew ba haba ki wan, kin wan da ka akor ka burom, ka tipbriew tip blei bad burom bad kohnguh ïa kaei kaba la pynïaid da ki nongkitkam jong ka Komiti bad jong ka seng hi baroh kawei.
